Ижтимоий тармоқларда бир нечта мактаб ўқувчиларининг ўзаро жанжаллашаётгани акс этган видео тарқалди. Мазкур ҳолат юзасидан Тошкент ИИББ ахборот хизмати маълумот берди.
Маълум қилинишича, 2021 йилнинг 28 сентябрь куни 94-сонли умумий ўрта таълим мактабининг 9 ва 10-синф ўқувчилари ва 145-сонли умумий ўрта таълим мактабининг 9-синф ўқувчилари Telegram мессенжери орқали ўзаро гап талашиб қолган.
Сўнг улар шу куни тахминан соат 13:20 ларда Тошкент шаҳар Миробод тумани Амир Темур кўчасида учрашиб, муносабатларни ҳал қилмоқчи бўлган. Мазкур учрашувга 20 нафарга яқин мактаб ўқувчилари келган ва уларнинг бир нечтаси ўртасида жанжал бошланган.
Ҳолатдан хабар топган ҳудудий профилактика инспекторлари Йўлдашбеков Абузоҳид ва Исамуҳамедов Тимур зудлик билан воқеа жойига этиб келган ва уларнинг аралашуви билан катта можаронинг олди олинган.
Мазкур ҳолат юзасидан Тошкент шаҳар ИИББ томонидан текширув ўтказилмоқда, натижаси бўйича қонуний қарор қабул қилиниши таъкидланган.
Изоҳ (0)