Фарғона вилоятининг Қўқон шаҳрида акасига 9 марта пичоқ урган 17 ёшли йигитга суд ҳукми ўқилди. Бу ҳақда «Дарё»га жиноят ишлари бўйича Қўқон шаҳар суди судьяси Элёр Ҳакимов маълум қилди.
Маълум бўлишича, 2021 йил 13 январь куни Қўқон шаҳар, Дегрезлик кўчасида яшовчи Ш.А. кечки пайт онаси билан телевизор кўриб ўтириб, қайси каналга олиш устида тортишиб қолган. Шу пайт йигитнинг акаси келиб, укасига шовқин кўтармасликни айтган ва ўртада жанжал келиб чиққан. Дастлаб уларни она ва тўнғич ака ажратган. Бироқ ука жаҳл устида ошхона пичоғини олиб, ҳовлида турган акасига тан жароҳати етказган. Ака кўчага қочиб чиққан, ука унга етиб олиб, яна бир неча маротаба пичоқ урган. Тан жароҳатлари оқибатида ҳолдан тойиб йиқилган акасини тепкилаётган вақтида қўшнилар чиқиб қолган. Шундан сўнг Ш.А. ҳодиса жойидан қочиб, яширинган.
Шифокорлар томонидан кўрсатилган тиббий муолажалар натижасида аканинг ҳаёти сақлаб қолинган.
Суд тиббий экспертизасининг 15 январдаги хулосасида жабрланувчи Ш.И.да кўкрак қафасининг олд ва орқа, ўнг ва чап юзаларида, икки елка соҳаларида, бел ва қорин бўшлиғида санчилган-кесилган ҳаёт учун хавфли бўлган оғир тан жароҳатлари мавжудлиги қайд этилган.
Жиноят ишлари бўйича Қўқон шаҳар судининг ҳукмига кўра Ш.А. Жиноят кодексининг 25-моддаси (жиноятга тайёргарлик кўриш ва жиноят содир этишга суиқасд қилиш) орқали 97-моддаси (қасддан одам ўлдириш) 1-қисми билан йигит айбли деб топилган.
Унинг муқаддам судланмагани, жабрланувчи билан яқин қариндошлиги инобатга олиниб, кодекснинг 57-моддаси (енгилроқ жазо тайинлаш) қўлланилиб, 7 йил озодликдан маҳрум этиш жазоси тайинланган.
Изоҳ (0)