Туркий кенгашга аъзо давлатлар ташқи ишлар вазирларининг Афғонистон бўйича қўшма баёноти қабул қилинди

27 сентябрь куни Ўзбекистон ташқи ишлар вазири Абдулазиз Комилов Туркий тилли давлатлар ҳамкорлик кенгашининг Афғонистондаги вазиятга бағишланган Ташқи ишлар вазирлари кенгаши навбатдан ташқари йиғилишида иштирок этди. Бу ҳақда вазирлик матбуот хизмати хабар берди.

Маълум қилинишича, йиғилишда Ўзбекистон, Туркия, Озарбайжон, Қозоғистон, Қирғизистон ташқи ишлар вазирлари ва Туркий кенгаш котибияти Афғонистон йўналишида биргаликда қўшма ҳаракатлар жиҳатларини, хусусан, кенг вакиллик асосида Афғонистон ҳукуматини тузиш зарурлиги, инсон ҳуқуқларига, жумладан, аёллар ва миллий озчилик ҳуқуқларига риоя қилинишини муҳокама қилган

Ўзбекистон ташқи ишлар вазири ўз нутқида Афғонистон масаласига тааллуқли асосий масалалар бўйича мамлакатнинг позициясига тўхталиб ўтган. Қайд этилганидек, Ўзбекистон Афғонистоннинг тинч ва мустақил давлат сифатида шаклланишидан манфаатдор. Афғонистон замини энди минтақа давлатлари ва умуман халқаро ҳамжамият учун хавф туғдирмаслиги керак.

Дунё давлатлари учун устувор вазифа Афғонистонни иқтисодий тусдаги минтақавий интеграцион жараёнларига янада фаол жалб қилиш, мамлакатда ижтимоий-иқтисодий лойиҳаларни амалга ошириш бўлиб қолиши кераклиги таъкидланган.

«Можародан кейинги Афғонистон стратегиясини ишлаб чиқиш муҳимлиги, шунингдек, мамлакатга зарур инсонпарварлик ёрдам кўрсатилиши давом этиши алоҳида қайд этилди. Тадбир якунида Туркий кенгашга аъзо давлатлар ташқи ишлар вазирларининг Афғонистон бўйича қўшма баёноти қабул қилинди», — дейилади хабарда.

Маълумот учун, Туркий тилли давлатлар ҳамкорлик кенгаши 2009 йил 3 октябрда Озарбайжоннинг Нахичеван шаҳрида тузилган бўлиб, дастлаб унга Туркия, Озарбайжон, Қозоғистон ва Қирғизистон аъзо эди. Шавкат Мирзиёев 2018 йил 3 сентябрь куни Қирғизистоннинг Чўлпонота шаҳрида бўлиб ўтган саммитда фахрий меҳмон сифатида иштирок этган. 2019 йилнинг октябрида эса Ўзбекистон Туркий тилли давлатлар ҳамкорлик кенгаши саммитида илк бор тўла ҳуқуқли аъзо сифатида иштирок этганди.