Венгрия Ўзбекистоннинг Самарқанд, Тошкент ва Бухоро каби йирик шаҳарларига авиақатновларни йўлга қўйишни режалаштирмоқда. Бу ҳақда бош вазир ўринбосари Азиз Абдуҳакимов ва Венгрия ташқи иқтисодий алоқалар ва ташқи ишлар вазири Петер Сиярто билан учрашувда маълум бўлди.
Туризм ва спорт вазирлиги матбуот хизматининг хабар беришича, учрашувда сайёҳлар алмашинувини қайта тиклаш ҳамда Ўзбекистон ва Венгрия ўртасида сайёҳлар оқимини сезиларли даражада ошириш бўйича аниқ чора-тадбирларни қабул қилиш асосий масалаларидан бири бўлди. Шу муносабат билан томонлар Wizz Air авиакомпанияси томонидан Будапешт—Самарқанд тўғридан-тўғри рейсларини йўлга қўйиш масаласини муҳокама қилди.
Венгрия ташқи ишлар вазири Будапештдан Ўзбекистоннинг Самарқанд, Тошкент ва Бухоро каби йирик шаҳарларига тўғридан-тўғри рейсларни амалга оширилишига катта қизиқиш билдирган. Шу билан бирга, Ўзбекистон аэропортларида хизмат кўрсатиш шартларини таъминлашда ва авиақатновларга оид битим имзоланишида кўмакка умид билдирди.
Ўзбекистон томони яқин вақт ичида Венгрия авиаташувчисига ушбу рейсни ишга тушириш учун энг қулай шарт-шароитларни яратиш ва уни ҳар томонлама қўллаб-қувватлашга тайёр эканлигини тасдиқлади.
AirlineRatings маълумотларига кўра, Wizz Air лоукостери 2021 йил учун 10 та энг хавфсиз ва арзон авиакомпаниялар рўйхатидан ўрин олган.
Изоҳ (0)