Ижтимоий тармоқларда оммалашаётган кулгили роликлар қаҳрамонлари — «Афандининг қизлари» ҳақида маълумотлар

Сўнгги пайтларда ижтимоий тармоқларда «Афандининг қизлари» деб номланган ҳажвий роликлар оммалашмоқда. Журналист Наргиза Муродова минглаб кузатувчилар эътиборини тортаётган ҳажвий роликлар ижрочилари билан суҳбатлашди.

Нигора Абдуллахонова ижодни телебошловчиликдан бошлаган. Шу кунгача «МТВ шоу», «Супер одамлар», «Дугоналар шоу» ва «Машҳурлик сари» кўрсатувларига бошловчилик қилган.

— Оддий ишчилар оиласида туғилганман. Оиламизга санъат бегона соҳа бўлса-да, болалигимдан бу йўналишга қизиққанман. 6 ёшимда Успенский номидаги мусиқа мактабига ўқишга қабул қилинганман. Ундан сўнг ҳозирги Ўзбекистон давлат санъат ва маданият институтида ўқидим. Аммо актриса бўлиш хаёлимга ҳам келмаганди. Чунки мен дирижорлик соҳаси таҳсил олганман. Мусиқани яхши тушунаман, аммо юртимизда бу йўналишдаги мутахассисларга эҳтиёж у қадар юқори эмас. Ойликлар ниҳоятда кам бўлгани учун ўзимни бошловчи ва актрисалик соҳасида синаб кўришни истадим.

Нигина Жабборова – «Илҳом» театри актрисаси, «Бахтсиз куёв» ва «Қадам» сериалида суратга тушган.

— Бухородаги ишчилар оиласида туғилганман. Оиламизда санъаткорлар йўқ. Аммо болалигимдан актриса бўламан, деб орзу қилганман.

«Афандининг қизлари» лойиҳаси қандайдир тайёргарлик ва узоқ изланишлар асосида яратилмаган. 2020 йилнинг карантин кучайтирилган, одамлар уйдан кўчага чиқмаётган пайтида Instagram учун роликлар олишни истадик. Муборак TikTok’ка қизиққани учун миллий руҳда комик видеолар олишни таклиф қилди. Илк видеонинг ўзиёқ кузатувчиларда илиқ таассурот уйғотди. Биз эса одамларнинг кайфиятини кўтариш учун ҳар куни видео олишга ҳаракат қилардик. Ном топишга жуда қийналганмиз, шунда «Афандининг қизлари» деган тўхтамга келганмиз. Афандининг 3 хил кўриниш ва характердаги қизлари кўпчиликка манзур бўлди.

Муборак Абдуллаева — Ўзбекистон давлат санъат ва маданият институти талабаси, «Дугоналар шоу» кўрсатуви қатнашчиси. «Бир ками тўлмаган дунё» ва «Хуш келибсиз» сериалларида суратга тушган.

— «Афандининг қизлари» телефонда суратга олинади. Бизда оператор ёки монтаж устаси йўқ. Операторлар билан ишлаб кўрдик, аммо ҳамкорликдан кўнглимиз тўлмади. Шу боис роликларни ўзимиз суратга оламиз. Телефон ёрдамида монтаж қилиб, кузатувчиларга тақдим этамиз.

Яқин кунларда «Афандининг қизлари Тошкентда» номли ситком ҳам экран юзини кўради. Иброҳим Аҳмедов продюсерлигидаги сериалда опа-сингилларнинг янги саргузаштларига гувоҳ бўлишингиз мумкин.