Ҳечдан кўра кеч яхши: 35 ёшдан кейин муваффақиятга эришган машҳур аёллар (фото)

Ёш муваффақият қозонишга тўсқинлик қилмаслигини ҳаммасига фақат ўз истеъдоди билан эришган энг омадли ва бадавлат аёллар ҳақида маълумот берамиз.

Катерина Фейк, Flickr асосчиларидан бири, 1969 йилда туғилган.

Молиявий аҳволи: 9,6 миллион доллар

Катеринанинг отаси америкалик, онаси эса филиппинлик бўлган. Болалигида ота-онаси унга телевизор кўришни тақиқлаган, шунинг учун Катеринанинг ягона овунчи — шеърият ва мумтоз мусиқа бўлган.

У 1991 йил Вассар коллежида санъат йўналиши бўйича бакалавр даражасини олган, лекин бошқа соҳани танлаган. У McDonald’s, Colgate-Palmolive ва Nike каби йирик компанияларида ишлаган Organic Online веб-ишлаб чиқиш агентлигининг етакчи дизайнери сифатида фаолият юритган.

У биринчи бизнесини 2002 йилда Ванкуверда бошлаган. Бу «Ҳеч қачон тугамайдиган» (Game Neverending) деб номланган жуда кўп ўйинчилар томонидан ўйналадиган онлайн ўйин эди. 2004 йилда, яъни Катерина 35 ёшида Flickr’га асос солди. Янги маҳсулот дунёдаги энг йирик бизнеслардан бирига айланди. 2005 йилда компанияни Yahoo! сотиб олди.

Тони Моррисон, ёзувчи, 1931 йилда туғилган

Молиявий аҳволи: 24 миллион доллар

Тони адабиёт бўйича бир қанча мукофотларни қўлга киритмасидан олдин (у Пулитцер ва Нобель мукофотларига сазовор бўлган), фаолиятини китобларни таҳрир қилишдан бошлаган.

1960 йилда Тони Random House’да муҳаррир бўлиб ишлаган. Турмушидан ажрашгандан кейин икки ўғлини якка ўзи тарбиялаган. У Тони бўлишидан олдин оддийгина Хлое Арделия Воффорд эди. Бўлажак ёзувчи оддий ишчилар оиласида ўсган, лекин болалигидан ўқишни яхши кўрарди.

Корнелл университетида магистрлик даражасини олгандан сўнг, Тони Жанубий Техас университетида инглиз тили ўқитувчиси бўлиб ишлай бошлади. Тони биринчи китоби — «Мовий кўзлар»ни 39 ёшида ёзган. Бу Тонининг Говард университетидаги ёзувчи ва шоирларнинг норасмий тўгарагида ўқиган илк ҳикояси эди.

Танқидчилар қора танли ёзувчининг биринчи асарини илиқ кутиб олишган бўлса-да, иккинчи китобидан фарқли ўлароқ унчалик яхши сотилмайди. Иккинчи асари «Сула» Миллий китоб мукофотига номзод бўлади. 1987 йилда Тони Пулитцер мукофотига сазовор бўлган «Севгилим» асарини нашр эттиради. Бу вақтда ёзувчи 58 ёшда эди.

Арианна Ҳаффингтон, The Huffington Post газетаси асосчиларидан бири, 1950 йилда туғилган.

Молиявий аҳволи: 50 миллион доллар

Арианна фамилияси билан аталадиган газета — The Huffington Post’га асос солганида 55 ёшда эди. Арианна ҳар доим газета бизнесига яқин бўлган, чунки у газетга эгалик қилувчи юнон оиласида туғилган. 16 ёшида у Англияга кўчиб ўтди ва  бу ерда иқтисод йўналиши бўйича таҳсил олди.

Huffington Post 2005 йилда кичик, кўпчиликка таниш бўлмаган интернет нашр сифатида иш бошлаган, 2011 йилда эса AOL интернет-компанияси уни 315 миллион долларга сотиб олган.

2009 йилда Арианна Forbes журналининг энг нуфузли аёллари рўйхатига киритилди. У 15 та китоб ёзган ва ўзини «уйқуни оммалаштирувчи» деб атайди: у уйқунинг турмушдаги ўрни ва нима учун етарли даражада ухлаш муҳимлиги ҳақида сўз юритади.

Нина Загат, ресторан танқидчиси, 1942 йилда туғилган

Молиявий аҳволи: 200 миллион доллар

Ҳозирда ресторан танқидчилари Нина ва Тим Загатнинг исмлари бутун дунёга маълум. Аммо 1979 йилгача эр-хотин шунчаки корпоратив адвокатлар эди. Улар Парижда ишлар, Нина машҳур Le Cordon Bleu ошпазлик мактаби дарсларига ёзилгунга қадар ҳаётлари бир текисда давом этаётганди.

Шундай қилиб, улар биргаликда Париж ресторанларини ўрганишни ва улар ҳақида қисқача шарҳлар ёзишни бошлади. Эр-хотин Нью-Йоркка қайтгач, дўстларидан улар ташриф буюрган ресторанларга қизиқа бошлади. 1980 йилга келиб Нина ва Тим бизнес ғоя ишлаб чиқишди: икки йил ўтгач эса илк ресторан қўлланмасини нашр этишди.

Уч йил ўтгач, «Gid Zagat» New York Times талқинига кўра, энг кўп сотилган қўлланмага айланди. Жуфтлик Лос-Анжелес, Сан-Франциско ва Чикагодаги ресторанларга ташриф буюришди ва ҳар бир янги шаҳарда тобора кўпроқ муваффақият қозонишди.

1987 йилда Тим мазкур бизнесни ривожлантириш учун адвокатлик ишини ташлади, кўп ўтмай Нина ҳам унга эргашди. Ўша пайтда Нина 47 ёшда эди.

Барбара Бредли Бекгард, Vera Bradley асосчиларидан бири

Молиявий аҳволи: 270 миллион доллар

Барбара ва унинг қўшниси Патрисия Миллер 1980 йилларда пахтадан сумка ишлаб чиқарувчи компания очди. Бекгард уйининг ертўласи ишлаб чиқариш корхонаси бўлган, бошланғич капитал эса атиги 250 доллар эди. Ғоя оддий: аёллар учун аксессуарлар ишлаб чиқариш эди.

2005 йилда компания даромади 100 миллион доллардан ошди. Ҳозирги кунда компания ходимларининг 70 фоизи ва бешта топ-менежернинг учтаси аёллардир. Барбара ва Патрисия Vera Bradley’га асос солганларида Барбара 42 ёшда эди.

Линда Вайнманн, Lynda.com онлайн-ресурси асосчиси, 1955 йилда туғилган

Молиявий аҳволи: 1,5 миллиард доллар

Линда компьютерда ишлашни мустақил равишда ўрганган. Аввалига у 1982 йилгача ишлаган иккита интернет-дўкон очди. Кейинчалик эса Lynda.com рақамли санъат мактабининг онлайн таълим платформасига 40 ёшида турмуш ўртоғи Брюс билан биргаликда асос солди.

2004 йилда сайтда 100 та курс бор эди. 2013 йил январь ойида Lynda.com бир гуруҳ венчур фондларидан 103 миллион долларлик сармоя олди. 2015 йилнинг май ойида эса Lynda.com Linkedin томонидан 1,5 миллиард долларга сотиб олинди.