Қашқадарёда МИБ ходимлари томонидан 2021 йилнинг ўтган даври мобайнида қарздорлардан 826 миллиард сўм маблағ ундирилиб, шунинг салкам 25 миллиард сўми «темир дафтар» «аёллар» ва «ёшлар» дафтарида рўйхатда турувчи кам таъминланган оилаларга тарқатилгани маълум бўлди. Бу ҳақда МИБнинг вилоят бошқармаси бошлиғи Одил Поёнов маълум қилди, дея хабар берди «Дарё» мухбири.

Фото: «Дарё»

Таъкидланишича, 25 сентябрь куни МИБнинг вилоят бошқармасида ҳудудда фаолият юритувчи журналист ва блогерлар учун матбуот анжумани ташкил этилган.

«Жорий йилнинг ўтган даври мобайнида келиб тушган 106 866 та 1 триллион 761 миллиард сўмлик ҳужжатнинг ижроси таъминланиб, амалда 826 миллиард сўм ундирилди. Шундан солиқ қарздорлиги бўйича 685 миллиард, жиноий ва маъмурий жарималар бўйича 25 миллиард, давлатга етказилган зарар бўйича 7,3 миллиард ва давлат божи бўйича 35 миллиард сўмлик ҳужжатлар тамомланган. Давлат фойдасига ундирув ўтган йилнинг шу даврига нисбатан 290 миллиард сўмга кўп бажарилган. Ундирилган маблағларнинг 24,5 миллиард сўми Президентимиз ташабусси билан ташкил этилган ‘темир дафтар’, ‘аёллар дафтари’ ва ‘ёшлар дафтариъга киритилган фуқароларни ижтимоий қўллаб-қувватлаш учун йўналтирилган», — дейди Одил Поёнов.

Қайд этилишича, йил бошидан 485 та 444,7 миллиард сўмлик мулк савдога чиқарилган ва 100 та 15,5 миллиард сўмлик мулк электрон-онлайн аукцион орқали сотилиб, сотувдан тушган маблағлар ундирувчиларга ўтказиб берилган.

«Мисол учун қарздор ‘Кеш оригинал сервис’ МЧЖнинг солиқ қарзини ундириш ҳақидаги ижро ҳужжати бўйича ташкилот биноси савдога чиқарилиб, 117 миллион сўмга сотилди ва тушган маблағ солиқ қарзини сўндиришга йўналтирилди», — дейди матбуот анжуманида сўз олган масъул.

Таъкидланишича, давлат даромадига ўтказиладиган мол-мулклар ундируви билан боғлиқ 1164 та 1 миллиард 346 миллион сўмлик ижро ҳужжатидан 1012 та 1 миллиард 293 миллион сўмлиги тамомланган. 353 та ҳужжат белгиланган тартибда йўқ қилинган.

«Масалан, Қарши тумани маъмурий суди қарорига асосан, ҳуқуқбузар Қодировга нисбатан маъмурий иш бўйича ашёвий далил деб эътироф этилган 23 минг дона пиротехника воситаси тегишли ташкилот вакиллари иштирокида йўқ қилинди», — дейди бошқарма бошлиғи.

Матбуот анжуманида қўшимча қилинишича, жиноий жарималар ундируви билан боғлиқ 192 та 2,7 миллиард сўмлик ижро ҳужжатларидан 118 та 1,8 миллиард сўмлиги тамомланган. 33 нафар қарздор ихтиёрий муддатда жаримани тўламаганлиги учун уларнинг жазоси бошқа турдаги жазога алмаштирилган. Давлат божи ундируви билан боғлиқ 26 922 та 45,5 миллиард сўмлик ижро ҳужжатидан 16 066 та 35,1 миллиард сўмлиги тамомланиб, давлат бюджетига ўтказилган.