Андижон вилоятининг Хонобод шаҳридаги «Кампирровот» маҳалласи ҳудуди, Андижон сув омбори атрофидаги 68 гектар ер майдонида сунъий кўл ҳавзаси ташкил этилади. Бу ҳақда «Дарё» мухбири Умиджон Мамарасулов хабар бермоқда.
Таъкидланишича, Президент Шавкат Мирзиёев 2020 йилда Андижон вилоятига ташрифи давомида ички туризмни ривожлантириш, хусусан, Хонобод шаҳрини туризм марказига айлантириш бўйича кўрсатма берган. Ушбу топшириқ ижросини амалга ошириш мақсадида бир йил давомида шаҳар ҳудудида ўрганишлар олиб борилган. Натижада Андижон сув омбори атрофи — шаҳарнинг «Кампирровот» маҳалласи ҳудудида сунъий кўл ҳавзаси ҳамда турли дам олиш масканларини қуриш бўйича лойиҳа тайёрланган.
Лойиҳа қиймати 50 миллиард сўмга яқин бўлиб, ушбу маблағларга сунъий кўл ҳавзасини ва унинг атрофида автомобиль йўли, вело ва пиёдалар йўлакларини қуриш-таъмирлаш ишлари, шунингдек, ичимлик суви ва оқова суви қувурини қуриш-таъмирлаш ишларини амалга ошириш режалаштирилган. Шунингдек, кўл атрофида 300 га яқин янги тадбиркорлик субъектлари, овқатланиш жойлари, кўнгилочар ва бошқа хизматлар ишга туширилади. Лойиҳани қуриш ишлари 2021—2022 йилларга мўлжалланган.
Хонобод шаҳар ҳокимлигининг маълум қилишича, айни пайтда ушбу лойиҳани амалга ошириш бўйича туркиялик лойиҳачилар ва инвесторлар билан музокаралар олиб борилмоқда.
Изоҳ (0)