Канада суди Хитойнинг Huawei компанияси молиявий директори Мэн Ваньчжоу АҚШдаги тергов билан битим тузганидан сўнг уни озод қилиш тўғрисида қарор чиқарди. Ваньчжоунинг Канадани тарк этишига рухсат берилди, деб ёзади «РИА Новости».
Фото: «РИА Новости»
АҚШда Эронга қарши санкцияларни бузиш билан боғлиқ фирибгарликда айбланган Мэн Ваньчжоу 2018 йилнинг декабрида АҚШ талабига биноан Канадада ҳибсга олинганди. Кейинчалик у 10 миллион Канада доллари (8 миллион АҚШ доллари) миқдоридаги гаров пули эвазига, GPS билагузугини тақиш ва унга бириктирилган қўриқчиларга ўзи ҳақ тўлаш мажбурияти билан уй қамоғига жойлаштирилган.
Мэн хоним Эронга қарши санкцияларнинг бузилишини яширганлик бўйича айбини қисман тан олди, АҚШ прокуратураси эса уни Канададан экстрадиция қилиш ҳақидаги сўровни қайтариб олди.
Канаданинг Британия Колумбияси провинцияси Олий суди Мэнни уй қамоғидан озод қилиш тўғрисида буйруқ чиқарди ва унга нисбатан олиб борилаётган ишни тўхтатди. Сўнг Канада Адлия вазирлиги Huawei директори мамлакатни тарк этиши мумкинлигини, чунки «экстрадиция жараёнларини давом эттириш учун ҳеч қандай асос йўқ» эканини эълон қилди.
CTV National News телекомпанияси хабарига кўра, Мэн Ваньчжоу қамоқдан озод қилинганидан кейин Канадани тарк этиб, Хитойга учиб кетди.
2018 йилда Мэн Ваньчжоу ҳибсга олингандан сўнг ушбу ҳаракат сиёсий экани борасида Канада ва Хитой ўртасида баҳс бошланганди. Ўша йилнинг декабрь ойида Хитой ҳукумати томонидан жосусликда айбланган икки канадалик Майкл Ковриг ва Майкл Спейвор ҳибсга олинди. Канада расмийлари буни Huawei молиявий директорининг ҳибсга олинишига жавоб деб гумон қилди. Спейворга 11 йилга озодликдан маҳрум этиш, мол-мулкини мусодара қилиш, ўзини эса депортация қилиш жазолари тайинланган. Ковригга қандай ҳукм ўқилгани номаълум.
Мэн Ваньчжоу озод қилинганидан сўнг бир вақтнинг ўзида Хитойда ҳибсда бўлган икки канадалик ҳам қамоқдан чиқарилди. Канада бош вазири Жастин Трюдонинг маълум қилишича, улар уйига қайтмоқда.
АҚШ маъмурияти ХХР ҳукуматининг канадаликларни озод қилиш ҳақидаги қарорини олқишлади. «АҚШ ҳукумати ва халқаро ҳамжамият ХХР ҳукуматининг Канада фуқаролари Майкл Ковриг ва Майкл Спейворни икки ярим йил асоссиз ҳибсда ушлаб тургандан сўнг озод қилиш ҳақидаги қарорини олқишламоқда. Биз уларнинг Канадага қайтаётганидан хурсандмиз», — деди АҚШ давлат котиби Энтони Блинкен.
