Коронавирус пандемияси давом этаётгани сабабли Нобель мукофоти ташкилотчилари тақдирлаш маросимнинг анъанавий форматини яна ўзгартиришга мажбур бўлди. 2020 йилги каби бу сафар ҳам лауреатлар Швецияга бориши шарт эмас. Мукофотни ўз мамлакатида олади, улар билан мулоқот эса онлайн тарзда амалга оширилади, дейилади Нобель фонди хабарида.
«Фикримча, ҳаммамиз пандемиянинг тугашини хоҳлагандик. Аммо ҳозирча бундай бўлмади. Декабрда саёҳат қилиш қоидалари қандай бўлиши номаълум (мукофотларни топшириш 10 декабрь, Нобель кунида Стокгольм мэриясида бўлиб ўтиши керак эди)», — деди фонд ижрочи директори Видар Хелгесен.
Шу билан бирга, ташкилотчилар Нобель ҳафталигининг очилиш маросимига маълум миқдордаги меҳмонлар таклиф этилишини ваъда қилди. Стокгольм ва Ослода маърузалар, семинарлар, концертлар ўтказиш режалаштирилган. Аммо байрам зиёфатидан воз кечишга қарор қилинди. Бунинг ўрнига тадбир тарихига бағишланган кўргазма бўлади.
Шу билан бирга, битта лауреат барибир офлайн тарзда тақдирланиши мумкин. Гап Норвегия пойтахтида тақдирланиши керак бўлган тинчлик бўйича Нобель мукофоти ғолиблари ҳақида кетмоқда. Бироқ Осло формат бўйича ҳали якуний қарорга келгани йўқ.
Тиббиёт, физика, кимё, адабиёт, иқтисодиёт соҳасидаги Нобель мукофоти лауреатларининг исмлари 4—11 октябрь кунлари эълон қилинади. Ўтган йили ташкилотчилар пандемия туфайли маросимга ўзгартиришлар киритганди. Ўшанда Стокгольм мэриясида телевизион студия жойлаштирилган, у орқали ташкилотчилар лауреатлар билан боғланган. Томошабинларнинг студияга киришига рухсат берилмаган.
Мавзуга доир:
- Тинчлик бўйича Нобель мукофотини Black Lives Matter ҳаракатига бериш таклиф қилинди
- Нобель қўмитаси иқтисодиёт бўйича мукофот совриндори билан боғлана олмади. Шу сабабли уни ярим тунда мукофотнинг бошқа соҳиби уйига келиб уйғотишга мажбур бўлди (видео)
- Ген таҳрири учун Нобель мукофоти. Қандай қилиб биокимёчилар генларни кўриш, балки уларга тегинишга ҳам эришди?
Изоҳ (0)