Россия музокараларда воситачилик қилса, Афғонистондан Бирлашган Миллатлар Ташкилотининг санкциялари олиб ташланишига ёрдам бериши мумкин. Бу ҳақда мамлакат муваққат ҳукумати маданият ва ахборот вазири ўринбосари, «Толибон» ҳаракати вакили Забиҳулла Мужоҳид айтиб ўтди.
«У (Россия) биз ва БМТ ўртасида, жумладан, санкциялар босимини пасайтириш масаласида янги воситачи бўлиши мумкин. Биз ундан минтақада ва хусусан, Афғонистонда тинчлик ўрнатишда, шунингдек, мамлакатимизни тиклаш жараёнида ёрдам сўраймиз», — деди «Толибон» вакили.
Мужоҳиднинг қўшимча қилишича, Кобул БМТ Хавфсизлик кенгашининг навбатдаги йиғилишларида қабул қилинадиган қарорлар афғонистонликлар учун фойдали бўлишига умид билдирмоқда.
Шу билан бирга, икки кун олдин Россиянинг БМТдаги доимий вакили Василий Небензя «Толибон»дан БМТ санкцияларини олиб ташлаш масаласи «ҳозир кун тартибида эмаслигини» айтганди. Бироқ у бу масалани эртами, кечми ҳал қилиш кераклигини таъкидлади. «Аммо буни шошма-шошарлик билан қилиш керак эмас. Биз вазиятнинг ривожланишини диққат билан кузатиб бориш зарурлигидан келиб чиқиб иш кўрамиз», — деди Небензя.
БМТ «Толибон»га қарши биринчи марта 1999 йилда, ҳаракат «Ал-Қоида» етакчиси Усама бин Ладенни экстрадиция қилишдан бош тортганидан кейин, жорий қилган. Шундан сўнг чекловларга бир неча бор тузатиш киритилди. «Толибон»га қарши амалдаги санкциялар орасида активларни музлатиш, толибларга бошқа мамлакатларга бориш ёки уларнинг ҳудуди орқали транзит қилишни ман этиш, шунингдек, қурол-яроғ етказиб беришни тақиқлаш мавжуд.
Изоҳ (0)