АҚШ ва Мексика чегарасида навбатдаги миграцион инқироз содир бўлмоқда. Асосан, Гаити давлатидан келган, тахминан, 14 мингга яқин муҳожир Техас штатининг 35 мингга яқин аҳоли яшайдиган Дел Рио шаҳрида лагер қурди. Муҳожирлар у ерга Мексиканинг Сюдад-Акуня шаҳридан Рио-Гранде дарёсининг саёз жойлардан кечиб ўтиш орқали келмоқда. Муҳожирларнинг бундай оқимига чегаранинг Мексика томонида назорат заифлашгани ва гаитиликларга АҚШдан бошпана олиш осонлашгани ҳақидаги миш-мишлар сабаб бўлган бўлиши мумкин.
Дел-Риога келганларга Рио-Гранде кўприги яқинидаги майдон ажратилган. Улар амалда очиқ ҳавода яшаб, бошпана учун мурожаат қилиш имкониятини кутмоқда. Вақти-вақти билан улар озиқ-овқат ва сув сотиб олиш, телефонларини зарядлаш учун Сюдад-Акуняга қайтади.
Америка ва Мексика ҳукумати Гаити фуқароларини депортация қилишни бошлади, Рио-Гранде қирғоғида эса АҚШ чегарани қўриқлаш хизматининг зобитлари айланиб юрибди. Бир неча кун олдин интернетда муҳожирларнинг Америка ҳудудига ўтишига тўсқинлик қилинаётгани акс этган фотосуратлар пайдо бўлди. Маълум бўлишича, офицерлар муҳожирларни қамчилаган, аммо бошқа манбаларга кўра, уларнинг қўлида фақат жиловлар бўлган. Оқ уй бу кадрларни даҳшатли деб атади, АҚШ Ички хавфсизлик вазирлиги эса тергов бошлади.
Изоҳ (0)