Italiyaning Sardiniya orolida mahalliy politsiya Kataloniyaning sobiq rahbari Karles Puchdemonni hibsga oldi. Bu haqda siyosatchining Facebook’dagi sahifasiga tayanib, “RBK” xabar berdi.

Karles Puchdemon

Foto: Reuters

Bu Algero xalqaro aeroportida sodir bo‘ldi, deyiladi Puchdemonning Facebook’dagi sahifasida, hozirda uning akkauntini yordamchilari yuritmoqda. “Uning hibsga olinishi ertaga Sassari Apellyatsiya sudida ko‘rib chiqiladi, ozod qilish yoki ekstraditsiya qilish masalasi ularning vakolatiga kiradi”, — deyiladi xabarda.

Puchdemon Kataloniyani boshqargan va 2017-yil 1-oktabrda mintaqaning Ispaniyadan mustaqil bo‘lishi to‘g‘risidagi referendumni o‘tkazish tashabbuskori bo‘lgan. Referendum davomida kataloniyaliklarning aksariyati — 90 foizdan ko‘prog‘i mustaqillik e’lon qilinishini qo‘llab-quvvatlagan. Kataloniya hukumati referendum o‘tkazilishini Madridning siyosati yetarlicha muxtoriyat bermayotgani bilan izohlagan.

Ispaniya hukumati ovoz berishni noqonuniy deb topdi; 2019-yilda Kataloniya ayirmachilarining yetakchilari ustidan sud bo‘lib o‘tdi. Bu ishni ko‘rib chiqayotgan Madrid Oliy sudi Kataloniya rahbarlarini referendumni tashkil etishda ishtirok etganlikda aybdor deb topdi. Ayblov yuzasidan 13 yilgacha ozodlikdan mahrum qilish jazolari tayinlandi.

Puchdemon Belgiyaga qochishga muvaffaq bo‘ldi. Madrid Kataloniyaning sobiq rahbarini ekstraditsiya qilishni talab qildi. 2018-yil mart oyining oxirida u Germaniyada hibsga olingan. 2020-yil yanvar oyining boshida Belgiya sudi siyosatchini Ispaniyaga ekstraditsiya qilish uchun orderning amal qilinishini to‘xtatdi, chunki u Yevropa Parlamenti deputati sifatida daxlsizlikka ega edi. Ammo shu yilning 9-martida parlament deputatlari Puchdemonning daxlsizligini bekor qilish uchun ovoz berdi.