Каталония собиқ раҳбари Италияда қўлга олинди

Италиянинг Сардиния оролида маҳаллий полиция Каталониянинг собиқ раҳбари Карлес Пучдемонни ҳибсга олди. Бу ҳақда сиёсатчининг Facebook’даги саҳифасига таяниб, «РБК» хабар берди.

Бу Алгеро халқаро аэропортида содир бўлди, дейилади Пучдемоннинг Facebook’даги саҳифасида, ҳозирда унинг аккаунтини ёрдамчилари юритмоқда. «Унинг ҳибсга олиниши эртага Сассари Апелляция судида кўриб чиқилади, озод қилиш ёки экстрадиция қилиш масаласи уларнинг ваколатига киради», — дейилади хабарда.

Пучдемон Каталонияни бошқарган ва 2017 йил 1 октябрда минтақанинг Испаниядан мустақил бўлиши тўғрисидаги референдумни ўтказиш ташаббускори бўлган. Референдум давомида каталонияликларнинг аксарияти — 90 фоиздан кўпроғи мустақиллик эълон қилинишини қўллаб-қувватлаган. Каталония ҳукумати референдум ўтказилишини Мадриднинг сиёсати етарлича мухторият бермаётгани билан изоҳлаган.

Испания ҳукумати овоз беришни ноқонуний деб топди; 2019 йилда Каталония айирмачиларининг етакчилари устидан суд бўлиб ўтди. Бу ишни кўриб чиқаётган Мадрид Олий суди Каталония раҳбарларини референдумни ташкил этишда иштирок этганликда айбдор деб топди. Айблов юзасидан 13 йилгача озодликдан маҳрум қилиш жазолари тайинланди.

Пучдемон Бельгияга қочишга муваффақ бўлди. Мадрид Каталониянинг собиқ раҳбарини экстрадиция қилишни талаб қилди. 2018 йил март ойининг охирида у Германияда ҳибсга олинган. 2020 йил январь ойининг бошида Бельгия суди сиёсатчини Испанияга экстрадиция қилиш учун ордернинг амал қилинишини тўхтатди, чунки у Европа Парламенти депутати сифатида дахлсизликка эга эди. Аммо шу йилнинг 9 мартида парламент депутатлари Пучдемоннинг дахлсизлигини бекор қилиш учун овоз берди.