Қирғиз-тожик чегарасида оммавий муштлашув содир бўлди, оқибатда тўрт нафар мактаб ўқувчиси касалхонага ётқизилди. Бу ҳақда Қирғизистоннинг Боткен вилояти раҳбари ўринбосари Маруфхон Тулаев «Интерфакс»га маълум қилди.
«23 сентябрь куни, тахминан 13:00 да (Тошкент вақти билан 14:00) тўрт нафар қирғизистонлик мактаб ўқувчиси тожикистонлик мактаб ўқувчилари томонидан калтакланди. Воқеа чегарадаги Кўктош қишлоғида содир бўлган. 30 га яқин тожикистонлик мактаб ўқувчилари уйга қайтаётганда болаларга ҳужум қилган», — деди Тулаев.
Унга кўра, калтакланган мактаб ўқувчилари 13-14 ёшда, улар турли жароҳатлар ва кўкаришлар билан касалхонага ётқизилган.
«Қирғиз-тожик чегарасидаги вазият хавфсизлик кучлари томонидан назорат қилинмоқда. Қирғизистон ва Тожикистон ички ишлар бошқармалари бошлиқлари чегарадаги ҳодисани ҳал қилиш учун музокаралар олиб бормоқда»,— дейди Тулаев.
Asia-Plus Тожикистоннинг Исфара шаҳар ҳокимлигидаги манбага ва маҳаллий аҳолига таяниб хабар беришича, Қирғизистоннинг Кўктош қишлоғида яшовчи бир гуруҳ аҳоли дастлаб тожикистонлик ўқувчи қизларга тош отган, кейин уларни калтаклаган: воқеа Тожикистоннинг Чоркух жамоати Сомониён қишлоғи яқинида содир бўлган.
«Соат 11:00 да чегарадаги Кўктош қишлоғидан бўлган қирғизистонликлар аввалига иккита ўқувчи қизга тош отиб, кейин эса калтаклаган. Бундан ташқари, улар қизларнинг уйига бостириб кириб, ота-онасини калтаклаган. Айтишларича, уйдаги кичкина бола ҳам тан жароҳати олган», — дейди маҳаллий аҳолидан бири Asia-Plus’га.
Манбанинг сўзларига кўра, бир эркакнинг жағи ва бурни синган, у касалхонага ётқизилган. Исфара марказий шифохонаси ҳодиса оқибатида уч киши касалхонага ётқизилганини тасдиқлади, бироқ тафсилотларни келтирмади.
Аввалроқ Қирғизистоннинг Боткен вилояти Тош-Тумшуқ қишлоғида тожикистонлик фуқаролар вилоят раҳбарининг машинасини тошбўрон қилгани ҳақида хабар берилганди.
Изоҳ (0)