Rossiya muzokaralarda vositachilik qilsa, Afg‘onistondan Birlashgan Millatlar Tashkilotining sanksiyalari olib tashlanishiga yordam berishi mumkin. Bu haqda mamlakat muvaqqat hukumati madaniyat va axborot vaziri o‘rinbosari, “Tolibon” harakati vakili Zabihulla Mujohid aytib o‘tdi.
“U (Rossiya) biz va BMT o‘rtasida, jumladan, sanksiyalar bosimini pasaytirish masalasida yangi vositachi bo‘lishi mumkin. Biz undan mintaqada va xususan, Afg‘onistonda tinchlik o‘rnatishda, shuningdek, mamlakatimizni tiklash jarayonida yordam so‘raymiz”, — dedi “Tolibon” vakili.
Mujohidning qo‘shimcha qilishicha, Kobul BMT Xavfsizlik kengashining navbatdagi yig‘ilishlarida qabul qilinadigan qarorlar afg‘onistonliklar uchun foydali bo‘lishiga umid bildirmoqda.
Shu bilan birga, ikki kun oldin Rossiyaning BMTdagi doimiy vakili Vasiliy Nebenzya “Tolibon”dan BMT sanksiyalarini olib tashlash masalasi “hozir kun tartibida emasligini” aytgandi. Biroq u bu masalani ertami, kechmi hal qilish kerakligini ta’kidladi. “Ammo buni shoshma-shosharlik bilan qilish kerak emas. Biz vaziyatning rivojlanishini diqqat bilan kuzatib borish zarurligidan kelib chiqib ish ko‘ramiz”, — dedi Nebenzya.
BMT “Tolibon”ga qarshi birinchi marta 1999-yilda, harakat “Al-Qoida” yetakchisi Usama bin Ladenni ekstraditsiya qilishdan bosh tortganidan keyin, joriy qilgan. Shundan so‘ng cheklovlarga bir necha bor tuzatish kiritildi. “Tolibon”ga qarshi amaldagi sanksiyalar orasida aktivlarni muzlatish, toliblarga boshqa mamlakatlarga borish yoki ularning hududi orqali tranzit qilishni man etish, shuningdek, qurol-yarog‘ yetkazib berishni taqiqlash mavjud.
Izoh (0)