Бухоро вилоятининг Олот туманидаги чўл массивида ов мавсуми тўхтатилганига қарамасдан овга чиққан браконьерлар ушланди. Бу ҳақда «Дарё»га вилоят Экология ва атроф-муҳитни муҳофаза қилиш бошқармаси ахборот хизмати хабар берди.
Таъкидланишича, вилоят Экология ва атроф-муҳитни муҳофаза қилиш бошқармаси Экоинспекция инспекторлари ҳамда Олот туман инспекцияси давлат инспекторлари томонидан экологик рейд тадбири ўтказилган.
Тадбир давомида «Қирлишон» массиви чўл ҳудудида кечки соат 01:00 да фуқаро Қ.У.га тегишли «ВАЗ—2107» автомашинаси тўхтатилиб, кўздан кечирилган. Автомашинада ҳайдовчидан ташқари яна икки нафар Олот туманида яшовчи З.М. ҳамда Б.В. исмли фуқаролар борлиги маълум бўлган. Фуқаролар чўл ҳудудида ов мавсуми тақиқланганига қарамай, ов қилиб қайтаётганини тан олган.
Бошқарма ходимлари томонидан фуқароларга тегишли бўлган 2 дона ов қуроли ҳамда 32 дона ўқ-дори тегишли тартибда ҳужжатлаштириб олинган.
«Суд қарори билан ҳуқуқбузар фуқаролардан 1 миллион 715 минг сўм жарима ундирилиб, 2 дона ов қуроли ва 32 дона ўқ-дори давлат эгалигига ўтказилди», — дейди бошқарма ахборот хизмати раҳбари Жаҳонгир Наврўзов.
Изоҳ (0)