Buxoro viloyatining Olot tumanidagi cho‘l massivida ov mavsumi to‘xtatilganiga qaramasdan ovga chiqqan brakonyerlar ushlandi. Bu haqda “Daryo”ga viloyat Ekologiya va atrof-muhitni muhofaza qilish boshqarmasi axborot xizmati xabar berdi.
Ta’kidlanishicha, viloyat Ekologiya va atrof-muhitni muhofaza qilish boshqarmasi Ekoinspeksiya inspektorlari hamda Olot tuman inspeksiyasi davlat inspektorlari tomonidan ekologik reyd tadbiri o‘tkazilgan.
Tadbir davomida “Qirlishon” massivi cho‘l hududida kechki soat 01:00 da fuqaro Q.U.ga tegishli “VAZ—2107” avtomashinasi to‘xtatilib, ko‘zdan kechirilgan. Avtomashinada haydovchidan tashqari yana ikki nafar Olot tumanida yashovchi Z.M. hamda B.V. ismli fuqarolar borligi ma’lum bo‘lgan. Fuqarolar cho‘l hududida ov mavsumi taqiqlanganiga qaramay, ov qilib qaytayotganini tan olgan.
Boshqarma xodimlari tomonidan fuqarolarga tegishli bo‘lgan 2 dona ov quroli hamda 32 dona o‘q-dori tegishli tartibda hujjatlashtirib olingan.
“Sud qarori bilan huquqbuzar fuqarolardan 1 million 715 ming so‘m jarima undirilib, 2 dona ov quroli va 32 dona o‘q-dori davlat egaligiga o‘tkazildi”, — deydi boshqarma axborot xizmati rahbari Jahongir Navro‘zov.
Izoh (0)