Хоразмда «Халқ сўзи» газетаси журналисти Саид Маҳсумов автоҳалокатга учраб, ҳалок бўлгани ҳақида хабар берилган эди. ЙҲХББ матбуот хизмати ушбу ЙТҲ ҳақида маълумот берди.
Унга кўра, воқеа 19 сентябрь куни соат 23:35 ларда Хоразм вилояти, Тупроққалъа тумани, Саримой қишлоғи ҳудудидан ўтган А-380 Ғузор—Бухоро—Нукус—Бейнеу халқаро аҳамиятга эга бўлган автомобиль йўлининг 493-километрида юз берган. Уч йўловчи бўлган Tacuma русумли машина Isuzu юк машинасига тўқнашган.
Оқибатда Tacuma ҳайдовчиси А.М. ҳодиса жойида, ушбу автомобиль йўловчилари С.М. шифохонага олиб кетилаётганда, Р.Ж. ва А.Қ. эса шифохонада вафот этган.
Қайд этилишича, мазкур ЙТҲ юзасидан Тупроққалъа тумани ИИБ ҳузуридаги ТБ томонидан Жиноят кодексининг 266-моддаси 3-қисми «а» банди (транспорт воситалари ҳаракати ёки улардан фойдаланиш хавфсизлиги қоидаларини бузиш одамлар ўлимига сабаб бўлиши) билан жиноят иши қўзғатилиб, ҳозирда дастлабки тергов ҳаракатлари олиб борилмоқда.
Изоҳ: Хабарнинг дастлабки таҳририда Тупроққалъа Қорақалпоғистондаги туман сифатида кўрсатилган эди. Бу хато — мазкур туман Хоразм вилоятида жойлашган. Хатолик сабаб етказилган ноқулайликлар учун узр сўраймиз.
Изоҳ (0)