«Халқ сўзи» газетаси журналисти Саид Маҳсумов Хоразмда автоҳалокатга учраб, ҳалок бўлди, деб хабар беради «Gazeta.uz».
Фото: Facebook / Саиджон Маҳсумов
Маълум қилинишича, ЙТҲ Хоразм вилоятининг Тупроққалъа туманида содир бўлган. Дастлабки маълумотларга кўра, тўрт киши — автомобиль ҳайдовчиси ва уч йўловчиси вафот этган.
Маълум қилинишича, 36 ёшли Саид Маҳсумов бошқа журналистлар билан биргаликда Нукусда бўлиб ўтган II Халқаро бахши фестиваль-танловининг ёритилишида қатнашган.
Саид Маҳсумов Тошкент вилоятида туғилган, Ўзбекистон давлат жаҳон тиллари университетининг Халқаро журналистика факультетини тамомлаган. Кўп йиллар давомида «Маърифат» ва «Халқ сўзи» газеталарида ишлаган.
Аввалроқ «Маданият ва маърифат» телеканалининг ходими 37 ёшида коронавирус оқибатида вафот этгани тўғрисида хабар берилганди.
Изоҳ: Хабарнинг дастлабки таҳририда Тупроққалъа Қорақалпоғистондаги туман сифатида кўрсатилган эди. Бу хато, мазкур туман Хоразм вилоятида жойлашган. Хатолик сабаб етказилган ноқулайликлар учун узр сўраймиз.
Изоҳ (0)