Қашқадарё вилоятининг Китоб туманида яшовчи собиқ меҳрибонлик уйи раҳбари Абдусалом Ҳақназаров олти нафар етим болани асраб олиб, вилоятда биринчилардан бўлиб оилавий болалар уйини ташкил қилди. Бу ҳақда «Дарё»га хабар берган Китоб тумани ҳокимлиги ахборот хизмати раҳбари Қаҳрамон Оқилов Ҳақназаровлар оиласи уч нафар ўғил ва уч нафар қиз болани ўз тарбиясига олганини билдирди.
Қайд этилишича, Ҳақназаровлар ташаббуси билан фаолиятини бошлаган оилавий болалар уйи очилишида Миллий гвардиянинг вилоят бошқармаси бошлиғи Умид Азимов, Китоб тумани ҳокими Алишер Зокиров бошчилигидаги сектор раҳбарлари, нуронийлар ва кенг жамоатчилик вакиллари иштирок этган.
«Дарё»нинг Андижон вилоятидаги мухбири Умиджон Мамарасуловнинг хабар беришича, вилоятда маҳалла раиси етти нафар етим болани ўз бағрига олган.
Маълум бўлишича, Андижон вилоятининг Андижон шаҳри «Қаландархона» маҳалласида яшовчи Дилдорахон ва Фарҳод Умаровлар «Болалар шаҳарчаси»да тарбияланаётган етти нафар етим болани тарбиясига олиб, ўз хонадонида оилавий болалар уйини ташкил этган.
Маҳалла раиси Фарҳод Умаров турмуш ўртоғи Дилдорахон билан келишиб, «Болалар шаҳарчаси»дан тегишли тартибда дастлаб икки нафар, сўнгра яна беш нафар болани тарбияга олиш бўйича мурожаат қилган. Миллий гвардиянинг вилоят бошқармаси мазкур масалани ўрганиб, оила шароити билан танишгач, барча талабларга жавоб бериши маълум бўлгач, оилавий болалар уйини очишга розилик берилган.
Таъкидланишича, 16 сентябрь куни мазкур оилавий болалар уйи очилиш маросими ўтказилган. Унда Миллий гвардия қўмондонлиги, шаҳар ҳокимлиги ва бошқа масъул бошқарма ҳамда ташкилотлар мутасадди раҳбарлари иштирок этиб, Умаровлар оиласи бошлаган ушбу олижаноб ишга муваффақият тилаган ҳолда доимо кўмакдош бўлишларига ишонч билдирилган.
«Ўзимизнинг уч нафар фарзандимиз бор эди. Бу болалар билан ўнтага етди. Шундан саккизтаси қиз, икки нафари ўғил. Бизга берилган ишончни оқлаб, буларнинг барчасини илмли, касб-ҳунарли қилиб тарбиялашга ваъда берамиз ҳамда қўлимиздан келганча буларни бахтли яшашлари учун шароит яратишга ҳаракат қиламиз», — дейди Фарҳод Умаров.
«Дарё»нинг Бухоро вилоятидаги мухбирига кўра, вилоятда уч нафар фарзанди бор хонадон эгалари Бухоро шаҳридаги 32-меҳрибонлик уйи тарбияланувчилари бўлган олти нафар болани асраб олган.
«Уч нафар фарзандим қаторида фарзандим бўлишсин, дея укам Ваҳобжон олти нафар болани асраб олишга имкони етишини билдирди. Тўғриси, укамнинг шу сўзидан хурсандчиликдан йиғлаб юбордим. Бухоро шаҳридаги 32-меҳрибонлик уйидан олти нафар болани асраб олди. Укамнинг савобли ишини Аллоҳнинг ўзи қўлласин», — дейди етим болаларни асраб олган тадбиркорнинг Миллий гвардия тизимида ишловчи кичик сержант Марзия Беҳбутова.
Миллий гвардиянинг вилоят бошқармаси масъули Мурод Раҳматуллаевнинг айтишича, Беҳбудовлар хонадони асраб олган болалар 7-16 ёшда. Улардан Азиза ва Измира Жўрақуловаларнинг онаси руҳий касалликка чалинган ва болалар парваришига лаёқатсиз даражага етгани боис оналик ҳуқуқидан маҳрум қилинган. Отаси эса улардан норасидалигидаёқ воз кечган ва иш баҳонасида узоқ ўлкаларга кетиб қолган. Дурдона Амонова, Кумуш Ёдгорова ҳамда Гулнавоз Болтаеваларнинг ота-оналари тарбиялашга нолойиқ, деб топилиб, суд қарори билан ота-оналик ҳуқуқидан маҳрум қилинган. Кенжа фарзанд Алибек Шомуҳаммедов эса чин етим.
Эслатиб ўтамиз, Шавкат Мирзиёев раислигида 2021 йилнинг 28 июль куни ўтказилган видеоселектор йиғилишида меҳрибонлик уйларидаги болаларни оилага яқин муҳитда тарбиялаш, билим ва маънавиятли, ватанпарвар инсонлар этиб вояга етказишга алоҳида эътибор қаратилиб, бу борада янги тизим жорий қилиниши ва бунга Миллий гвардия масъул этиб белгиланиши таъкидланган эди.
Изоҳ (0)