Сирдарёдаги бир-бирига туташ уйларда ёнғин содир бўлди

Сирдарё вилояти Оқолтин туманида бир-бирига туташ хонадонларда ёнғин содир бўлди дея хабар қилмоқда Фавқулодда вазиятлар вазирлиги.

Қайд этилишича, 18 сентябрь куни соат 16:08 да Сирдарё вилояти Оқолтин тумани «Аҳиллик» МФЙ Бунёдкор кўчасида жойлашган хонадонларда ёнғин содир бўлаётгани тўғрисида туман Фавқулодда вазиятлар бўлимига хабар келиб тушган.

Зудлик билан 3 та ёнғин-қутқарув экипажи воқеа жойига соат 16:25 да етиб бориб, ёнғин соат 16:28 да ўраб олинган ва соат 17:15 да ўчирилган.

Ёнғин оқибатида бир-бирига туташ қурилган уйларнинг, тахминан, 190 квадрат метр майдонда томи, шифти ва ички қисми ёниб зарарланган.

Ҳодиса оқибатида ҳалок бўлган ва жабрланганлар йўқ. Ҳозирда ёнғин сабаби ва моддий зарар миқдори аниқланмоқда. Вазирлик хабарида ёнғин содир бўлган хонадонларнинг сони келтирилмаган.

Бундан аввал Самарқанддаги хонадонларнинг бирида ёнғин содир бўлгани, Юнусободдаги ошхонада ёнғин келиб чиққани ҳамда Наманганда талабалар турар жойида ёнғин содир бўлгани ҳақида хабар берилганди.