Farg‘ona viloyatining Farg‘ona tumanida yashovchi Nabijon Valiyevlar oilasi mehribonlik uyida tarbiyalanayotgan olti nafar yetim bolani o‘z tarbiyasiga oldi, deya xabar berdi “Daryo” Azizjon Ermatov.

Foto: Milliy gvardiyaning Farg‘ona viloyati boshqarmasi

Qayd etilishicha, viloyatda davlat rahbarining 2021-yil 9-avgustda qabul qilingan “Yetim bolalar va ota-ona qaramog‘idan mahrum bo‘lgan bolalarni tarbiyalashning tubdan yangilangan tizimini joriy etish chora-tadbirlari to‘g‘risida”gi qarori asosida xayrli ishlar boshlab yuborilgan.

Foto: Milliy gvardiyaning Farg‘ona viloyati boshqarmasi

Farg‘ona tumani “Cheksho‘ra” mahalla fuqarolar yig‘inida istiqomat qiluvchi Nabijon Valiyevlar oilasi Marg‘ilon shahridagi 1-sonli mehribonlik uyidan tegishli tartibda olti nafargacha bolani tarbiyaga olish bo‘yicha murojaat qilgan. Milliy gvardiyaning viloyat boshqarmasi mazkur masalani o‘rganib, oila sharoiti bilan tanishgach, barcha talablarga javob berishi ma’lum bo‘lgan.

Foto: Milliy gvardiyaning Farg‘ona viloyat boshqarmasi

Oila uch yildan beri farzand asrab olish uchun tegishli idoralarga murojaat qilib, natija ololmagan. Milliy gvardiyaning Farg‘ona viloyati boshqarmasi boshlig‘i, polkovnik Shavkat Akbarov mazkur muammoni o‘rganib, ijobiy hal qilgan. Hujjatlar rasmiylashtirilib, Valiyevlar oilasi Marg‘ilon shahridagi 1-sonli mehribonlik uyidan 6 nafar chin yetim bolani farzandlikka olgan.

Bolalar oilaga berilganidan keyin Milliy gvardiya va viloyat hokimligi mas’ullari ularni o‘z holiga tashlab qo‘ygani yo‘q. Bolalardan xabar olinib, suhbatlar tashkil etilmoqda. Shuningdek, ularning o‘qishlari uchun sharoitlar yaratib berishga ko‘maklashilmoqda.

Foto: Milliy gvardiyaning Farg‘ona viloyat boshqarmasi

Nabijon Valiyev ko‘p bolali oilada voyaga yetgan, u tadbirkor, turmush o‘rtog‘i Ziyodaxon Valiyeva esa Farg‘ona shahridagi 4-umumta’lim maktabida ma’naviy-ma’rifiy ishlar bo‘yicha direktor o‘rinbosari lavozimida ishlaydi. Ularning 4 nafar farzandlari endi 10 nafarga yetdi.