ОАВ: Туркманистонда пахта теримига муҳожирлар, ичкиликбозлар ва фоҳишалар юборилмоқда

Туркманистоннинг Болқон вилоятида полиция кучлари меҳнат муҳожирларини, алкоголизмга чалинганлар, фоҳишалик қиладиган аёллар ва алимент бўйича қарздорларни пахта териш учун мажбуран далага юбормоқда. Бу ҳақда Azatlyk Radiosy’га таяниб, Asia-Plus хабар берди.

Полиция ходимлари одамларни бўлимга чақириб, улардан пахта теримида иштирок этишни талаб қилмоқда, дея хабар берди радио мухбири.

«Ушбу фуқаролар Сердар этрапининг ‘Азади’, ‘Ёшлик’, ‘Сарп’ ва ‘Жанахир’ фермер хўжаликларида, шунингдек, Берекет этрапининг ‘Узунсув’, ‘Махтумқули’ ва ‘Туркманистон’ фермер хўжаликларида мажбуран пахта далаларига юборилган», — деди манба нашр журналистига.

Таъкидланишича, полиция буни «меҳнат билан ахлоқ тузатиш ишлари» деб баҳолаб, «жазонинг бир қисми» деб айтмоқда.

Аввалроқ Azatlyk Radiosy’нинг туркман хизмати давлат хизматчилари мажбуран пахта далаларига юборилгани ҳақида хабар берганди. Нашр 24 август куни Лебап вилоятида қўриқчи полкининг ходимлари пахта теримига жалб қилингани, 27 август куни эса ўқитувчилар ва ўрта мактаб ўқувчилари ҳам далага мажбуран юборилгани ҳақида ёзган.

Мухбирларнинг 30 августда берган хабарига кўра, расмийлар алимент тўлаши керак бўлган фуқароларни пахта теришга мажбурламоқда. Нашрда қайд этилишича, бу йил Туркманистон 1,25 миллион тонна пахта теришни режалаштирган.

Туркманистонда мажбурий меҳнат нафақат пахтани теришда, балки уни етиштиришда ҳам қўлланади. Август ойида Azatlyk Radiosy’нинг туркман хизмати Дарганат этрапидаги ўрта мактаб ўқитувчилари пахта яганалашга юборилгани ҳақида хабар берганди.

Халқаро инсон ҳуқуқлари ташкилотлари Туркманистоннинг пахта ишлаб чиқаришда мажбурий ва болалар меҳнатидан фойдаланишини танқид қилиб келади. Responsible Sourcing Network веб-сайтида ёзилишича, 2021 йил 10 августга қадар 138 та глобал бренд халқаро кампанияларга қўшилиб, товар ишлаб чиқаришда туркман пахтасидан фойдаланмаслик мажбуриятини олган.

Маълумот учун, узоқ йиллар давомида пахта терими мавсумида болалар ва мажбурий меҳнатдан фойдаланилгани боис Ўзбекистон пахтаси халқаро жамоатчилик томонидан «қора рўйхатлар»га киритилган, етакчи ишлаб чиқарувчилар Ўзбекистон пахтасини бойкот қилган эди. Халқаро меҳнат ташкилотининг Вашингтондаги офиси директори Кевин Кассиди эса ўзбек пахтаси бойкотини асоссиз деб эълон қилганди.

2017 йил бошида Халқаро меҳнат ташкилоти Ўзбекистонда пахта теришда ташкиллаштирилган болалар меҳнати амалиёти тугатилишига эришилганини эълон қилган эди. «Болалар меҳнатининг номақбуллиги жамиятнинг барча қатламлари: ҳукумат, ўқитувчилар, мутахассислар, фермерлар, ота-оналар ва болаларнинг ўзлари томонидан тан олинади. Ўзбекистон ташкиллаштирилган болалар меҳнати амалиётини тугатди», — дейилади ХМТнинг 2016 йилги пахта териш кампанияси устидан мустақил мониторинг якунлари бўйича ҳисоботида.