Turkmanistonning Bolqon viloyatida politsiya kuchlari mehnat muhojirlarini, alkogolizmga chalinganlar, fohishalik qiladigan ayollar va aliment bo‘yicha qarzdorlarni paxta terish uchun majburan dalaga yubormoqda. Bu haqda Azatlyk Radiosy’ga tayanib, Asia-Plus xabar berdi.
Politsiya xodimlari odamlarni bo‘limga chaqirib, ulardan paxta terimida ishtirok etishni talab qilmoqda, deya xabar berdi radio muxbiri.
“Ushbu fuqarolar Serdar etrapining ‘Azadi’, ‘Yoshlik’, ‘Sarp’ va ‘Janaxir’ fermer xo‘jaliklarida, shuningdek, Bereket etrapining ‘Uzunsuv’, ‘Maxtumquli’ va ‘Turkmaniston’ fermer xo‘jaliklarida majburan paxta dalalariga yuborilgan”, — dedi manba nashr jurnalistiga.
Ta’kidlanishicha, politsiya buni “mehnat bilan axloq tuzatish ishlari” deb baholab, “jazoning bir qismi” deb aytmoqda.
Avvalroq Azatlyk Radiosy’ning turkman xizmati davlat xizmatchilari majburan paxta dalalariga yuborilgani haqida xabar bergandi. Nashr 24-avgust kuni Lebap viloyatida qo‘riqchi polkining xodimlari paxta terimiga jalb qilingani, 27-avgust kuni esa o‘qituvchilar va o‘rta maktab o‘quvchilari ham dalaga majburan yuborilgani haqida yozgan.
Muxbirlarning 30-avgustda bergan xabariga ko‘ra, rasmiylar aliment to‘lashi kerak bo‘lgan fuqarolarni paxta terishga majburlamoqda. Nashrda qayd etilishicha, bu yil Turkmaniston 1,25 million tonna paxta terishni rejalashtirgan.
Turkmanistonda majburiy mehnat nafaqat paxtani terishda, balki uni yetishtirishda ham qo‘llanadi. Avgust oyida Azatlyk Radiosy’ning turkman xizmati Darganat etrapidagi o‘rta maktab o‘qituvchilari paxta yaganalashga yuborilgani haqida xabar bergandi.
Xalqaro inson huquqlari tashkilotlari Turkmanistonning paxta ishlab chiqarishda majburiy va bolalar mehnatidan foydalanishini tanqid qilib keladi. Responsible Sourcing Network veb-saytida yozilishicha, 2021-yil 10-avgustga qadar 138 ta global brend xalqaro kampaniyalarga qo‘shilib, tovar ishlab chiqarishda turkman paxtasidan foydalanmaslik majburiyatini olgan.
Ma’lumot uchun, uzoq yillar davomida paxta terimi mavsumida bolalar va majburiy mehnatdan foydalanilgani bois O‘zbekiston paxtasi xalqaro jamoatchilik tomonidan “qora ro‘yxatlar”ga kiritilgan, yetakchi ishlab chiqaruvchilar O‘zbekiston paxtasini boykot qilgan edi. Xalqaro mehnat tashkilotining Vashingtondagi ofisi direktori Kevin Kassidi esa o‘zbek paxtasi boykotini asossiz deb e’lon qilgandi.
2017-yil boshida Xalqaro mehnat tashkiloti O‘zbekistonda paxta terishda tashkillashtirilgan bolalar mehnati amaliyoti tugatilishiga erishilganini e’lon qilgan edi. “Bolalar mehnatining nomaqbulligi jamiyatning barcha qatlamlari: hukumat, o‘qituvchilar, mutaxassislar, fermerlar, ota-onalar va bolalarning o‘zlari tomonidan tan olinadi. O‘zbekiston tashkillashtirilgan bolalar mehnati amaliyotini tugatdi”, — deyiladi XMTning 2016-yilgi paxta terish kampaniyasi ustidan mustaqil monitoring yakunlari bo‘yicha hisobotida.
Izoh (0)