Шавкат Мирзиёев 16—17 сентябрь кунлари Тожикистон пойтахти Душанбе шаҳрида Шанхай ҳамкорлик ташкилотига аъзо давлатлар раҳбарлари кенгашининг навбатдаги йиғилишида иштирок этади. Бу ҳақда Президент матбуот котиби Шерзод Асадов 13 сентябрь куни ўтказилган брифингда маълум қилди, деб хабар беради «Дарё» мухбири.
2020 йилда ШҲТ саммити пандемия сабабли онлайн форматда ўтказилган эди. Бу сафар давлат раҳбарлари бевосита учрашадилар. Эътиборлиси, ШҲТнинг ушбу саммити ташкилот тузилганининг 20 йиллиги нишонланаётган бир пайтга тўғри келмоқда.
Президент матбуот котибининг маълум қилишича, саммитнинг биринчи куни, 16 сентябрда Шавкат Мирзиёев ташкилотга раислик қилаётган Тожикистон президенти Эмомали Раҳмон, Россия президенти Владимир Путин ва Покистон бош вазири Имрон Хон билан, 17 сентябрь куни эса Эрон президенти Иброҳим Раисий билан икки томонлама учрашувлар ўтказади.
17 сентябрь куни эса давлат раҳбарларининг йиғилиши ўтказилади. Йиғилиш якунида ШҲТга раислик Тожикистондан Ўзбекистонга ўтади.
«Кўплаб хорижий экспертларнинг фикрича, Президент Шавкат Мирзиёев томонидан кейинги беш йилда олиб борилаётган кенг кўламли ишлар ҳисобга олинса, Ўзбекистоннинг ШҲТга раислиги хавфсизлик ва юзага келиши мумкин бўлган хавф-хатарларнинг олдини олиш нуқтаи назаридан алоҳида аҳамиятга эга бўлади.
Мамлакатимиз раислиги жуда самарали бўлади, ташкилот фаолиятини янада жонлантиради деб қатъий ишонч билдирилмоқда. Ўша куни янги форматдаги ‘Шанхай ҳамкорлик ташкилоти—Коллектив хавфсизлик шартномаси ташкилоти’ учрашуви бўлиб ўтади. Унда томонлар Афғонистондаги вазиятни муҳокама қиладилар», — деди Шерзод Асадов.
Эслатиб ўтамиз, Ўзбекистон Президенти Тожикистонга сўнгги марта 10−11 июнь кунлари расмий ташриф билан борганди. Ундан аввалроқ, 2019 йил 14 июнида Осиёда ўзаро ҳамкорлик ва ишонч чоралари бўйича конференциянинг бешинчи саммитида иштирок этиш учун Тожикистонга борганди.
Изоҳ (0)