Shavkat Mirziyoyev 16—17-sentabr kunlari Tojikiston poytaxti Dushanbe shahrida Shanxay hamkorlik tashkilotiga a’zo davlatlar rahbarlari kengashining navbatdagi yig‘ilishida ishtirok etadi. Bu haqda Prezident matbuot kotibi Sherzod Asadov 13-sentabr kuni o‘tkazilgan brifingda ma’lum qildi, deb xabar beradi “Daryo” muxbiri.
2020-yilda ShHT sammiti pandemiya sababli onlayn formatda o‘tkazilgan edi. Bu safar davlat rahbarlari bevosita uchrashadilar. E’tiborlisi, ShHTning ushbu sammiti tashkilot tuzilganining 20 yilligi nishonlanayotgan bir paytga to‘g‘ri kelmoqda.
Prezident matbuot kotibining ma’lum qilishicha, sammitning birinchi kuni, 16-sentabrda Shavkat Mirziyoyev tashkilotga raislik qilayotgan Tojikiston prezidenti Emomali Rahmon, Rossiya prezidenti Vladimir Putin va Pokiston bosh vaziri Imron Xon bilan, 17-sentabr kuni esa Eron prezidenti Ibrohim Raisiy bilan ikki tomonlama uchrashuvlar o‘tkazadi.
17-sentabr kuni esa davlat rahbarlarining yig‘ilishi o‘tkaziladi. Yig‘ilish yakunida ShHTga raislik Tojikistondan O‘zbekistonga o‘tadi.
“Ko‘plab xorijiy ekspertlarning fikricha, Prezident Shavkat Mirziyoyev tomonidan keyingi besh yilda olib borilayotgan keng ko‘lamli ishlar hisobga olinsa, O‘zbekistonning ShHTga raisligi xavfsizlik va yuzaga kelishi mumkin bo‘lgan xavf-xatarlarning oldini olish nuqtayi nazaridan alohida ahamiyatga ega bo‘ladi.
Mamlakatimiz raisligi juda samarali bo‘ladi, tashkilot faoliyatini yanada jonlantiradi deb qat’iy ishonch bildirilmoqda. O‘sha kuni yangi formatdagi ‘Shanxay hamkorlik tashkiloti—Kollektiv xavfsizlik shartnomasi tashkiloti’ uchrashuvi bo‘lib o‘tadi. Unda tomonlar Afg‘onistondagi vaziyatni muhokama qiladilar”, — dedi Sherzod Asadov.
Eslatib o‘tamiz, O‘zbekiston Prezidenti Tojikistonga so‘nggi marta 10−11-iyun kunlari rasmiy tashrif bilan borgandi. Undan avvalroq, 2019-yil 14-iyunida Osiyoda o‘zaro hamkorlik va ishonch choralari bo‘yicha konferensiyaning beshinchi sammitida ishtirok etish uchun Tojikistonga borgandi.
Izoh (0)