Қозон—2021. Ўзбекистон делегацияси МДҲ ўйинларида 91 та медалга эга чиқди ва умумжамоа ҳисобида 2-ўринни қўлга киритди

Россиянинг Қозон шаҳрида 4—11 сентябрь кунлари ўтказилган биринчи МДҲ ўйинлари ўз якунига етди. Унда 14 ёшдан 23 ёшгача бўлган спортчилар ўзаро беллашди.

Ушбу мусобақада иштирок этган Ўзбекистон делегацияси 91 та медал билан умумжамоа ҳисобида иккинчи ўринни эгаллади. Ўзбекистонлик спортчилар 23 та олтин, 32 та кумуш ва 36 та бронза медалига эга чиқди.

Ўзбекистон 106 та медалга эга чиққан Қозоғистонни (18 та олтин) медаллар сифатида бўйича (23 та олтин) ортда қолдирди. Биринчи ўрин кутилганидек Россияники бўлди (215 та медал — 114 олтин, 42 кумуш, 59 бронза).

МДҲ ўйинларида 9 та давлат — Россия, Ўзбекистон, Озарбайжон, Беларусь, Қирғизистон, Қозоғистон, Тожикистон, Молдова ва Арманистон вакиллари иштирок этди.