Qozon—2021. O‘zbekiston delegatsiyasi MDH o‘yinlarida 91 ta medalga ega chiqdi va umumjamoa hisobida 2-o‘rinni qo‘lga kiritdi

Rossiyaning Qozon shahrida 4—11-sentabr kunlari o‘tkazilgan birinchi MDH o‘yinlari o‘z yakuniga yetdi. Unda 14 yoshdan 23 yoshgacha bo‘lgan sportchilar o‘zaro bellashdi.

Ushbu musobaqada ishtirok etgan O‘zbekiston delegatsiyasi 91 ta medal bilan umumjamoa hisobida ikkinchi o‘rinni egalladi. O‘zbekistonlik sportchilar 23 ta oltin, 32 ta kumush va 36 ta bronza medaliga ega chiqdi.

O‘zbekiston 106 ta medalga ega chiqqan Qozog‘istonni (18 ta oltin) medallar sifatida bo‘yicha (23 ta oltin) ortda qoldirdi. Birinchi o‘rin kutilganidek Rossiyaniki bo‘ldi (215 ta medal — 114 oltin, 42 kumush, 59 bronza).

MDH o‘yinlarida 9 ta davlat — Rossiya, O‘zbekiston, Ozarbayjon, Belarus, Qirg‘iziston, Qozog‘iston, Tojikiston, Moldova va Armaniston vakillari ishtirok etdi.