Қўшиқчи Бритни отасининг васийлигидан озод бўлиш учун олиб борган курашини бутун дунё кузатди. Узоқ кутилган ғалаба ва отасининг истеъфосидан сўнг, қўшиқчидан мусиқа соҳасида янада кўпроқ ютуқлар кутилмоқда. Шунингдек, Бритни ҳали янги тароналарни чиқармаган бўлса-да, нашрлар рейтингида энг юқори ўрнини эгаллади.
Шундай қилиб, 2021 йил 10 сентябрь куни Time журнали хонанда TIME100 кузатувчиларининг сўровномасида биринчи ўринни эгаллаганини эълон қилди. Сўровномага кўра, ҳар йили энг нуфузли кишилар рўйхатига киритилиши керак бўлган инсонлар сараланади. Ҳаммаси бўлиб 1,8 миллион киши овоз берган ва Бритни эса ундан 4 фоизи, яъни 72 мингга яқин овоз тўплаган.
«Таниқли хонанда бу йил янгиликлар дастурида устунлик қилди, нафақат мухлислар, балки бутун дунё бўйлаб инсонлар 13 йиллик васийликни тугатилиши ва Бритнининг озод қилинишини талаб қилди. 2021 йилнинг июнь ойида Спирс ўзининг аҳволи ҳақида биринчи марта судда очиқ гапирди ва унга ўта қийин шароитлар қўйилганини даъво қилди. Унинг эркинлик учун кураши ногиронлик ҳуқуқлари ҳимоячиларининг кўпчилиги ислоҳ қилишни хоҳлаган тизим муаммоларини очиб берди», — дейилади журналда. Бундан ташқари, нашрда хонанданинг мусиқа саноатига қўшган улкан ҳиссаси ҳам қайд этилди.
Таъкидлаш жоизки, рейтингда иккинчи ўринни тиббиёт ходимлари эгаллади. Улар 3,1 фоиз овозга эга, ундан кейин вакцина ишлаб чиқарувчилар 2,5 фоиз овоз тўплашга муваффақ бўлди. Кореянинг BTS гуруҳи эса тўртинчи ўринни 2,1 фоиз билан эгаллади. Кучли бешликни Симона Байлз ёпди, у 2 фоиз овозга эга. Йилнинг энг нуфузли кишиларининг тўлиқ рўйхати 15 сентябрда эълон қилинади.
Изоҳ (0)