Prezident Shavkat Mirziyoyev 10-sentabr, juma kuni Tokiodagi yozgi Paralimpiya o‘yinlari ishtirokchilari bilan o‘tkazilgan uchrashuvda O‘zbekiston Milliy paralimpiya qo‘mitasi tarkibida “Matonat maktabi”ni tashkil etishni taklif qildi. Bu haqda “Daryo” muxbiri xabar bermoqda.
“Paralimpiya sport turlari bo‘yicha trenerlarni tayyorlash hamda ularni ijtimoiy qo‘llab-quvvatlashga ham alohida e’tibor qaratish lozim. Bu borada yoshlar o‘rtasida sport tadbirlarini tashkil etish va o‘tkazishga mas’ul bo‘lgan maxsus instruktor va tashkilotchilarni tayyorlash tizimini yo‘lga qo‘yish talab etiladi. Abduhakimov joriy yil yakuniga qadar paralimpiya sport turlari bo‘yicha nom qozongan sportchilarimizni murabbiy sifatida ishga qabul qilish tizimini joriy etsin”, — dedi davlat rahbari.
Prezident 2022/2023-o‘quv yilidan boshlab, O‘zbekiston Milliy paralimpiya qo‘mitasi qoshida Paralimpiya sport turlari bo‘yicha mutaxassislarni tayyorlash instituti faoliyatini tashkil etish choralarini ko‘rish bo‘yicha ham mas’ullarga topshiriq berdi.
“Para-sportchilarni muntazam ravishda tibbiy ko‘rikdan o‘tkazish, jismoniy va ruhiy tayyorgarligini oshirish maqsadida, ularni Respublika sport tibbiyoti ilmiy-amaliy markaziga biriktiriladi. Shuningdek, ular maxsus dori-darmon hamda xalq tabobati vositalari bilan ta’minlanadi.
Respublikada qishki sport turlarini ham rivojlantirish maqsadida, Abduhakimov, M.Toshxo‘jayev hokimliklar bilan birgalikda paralimpiya qishki sport turlari bo‘yicha kelgusi yillarda xalqaro musobaqalarda sportchilarimizning ishtirokini ta’minlasin.
Buning uchun “Amirsoy” tog‘-chang‘i sport majmuasi hamda Humo Arena muz saroyi bazalarida paralimpiyachilar uchun sharoit yaratish zarur”, — dedi Shavkat Mirziyoyev.
Izoh (0)