Бош прокуратура ҳузуридаги департаментнинг ҳудудий бўлинмалари томонидан ДХХ билан ҳамкорликда ўтказган тезкор тадбирлари давомида ер сотиш билан боғлиқ қатор фирибгарлик ҳолатларига чек қўйилди. Бу ҳақда идора матбуот хизмати хабар берди.

Департаментнинг Тошкент вилояти Олмалиқ шаҳар бўлими томонидан ўтказилган тезкор тадбирда фуқаро С.А. бошқа бир фуқарога ажратилган 20 сотих ер майдонини фирибгарлик йўли билан 110 минг АҚШ долларига сотишга келишиб, олдиндан 20 минг АҚШ долларини олган вақтида ашёвий далиллар билан ушланган.

Шунингдек, департамент ҳамда ДХХнинг Фарғона вилояти бошқармалари томонидан ўтказилган тезкор тадбирда фуқаро С.У. Бешариқ туманида жойлашган «Қўқон давлат ўрмон хўжалиги»га тегишли 5 гектар ер майдонини фуқаро Д.га расмийлаштириб бериш эвазига 8 минг доллар олган вақтида ашёвий далиллар билан қўлга олинган.

Бундан ташқари, департаментнинг Тупроққалъа туман бўлими ҳамда ДХХнинг Хоразм вилоят бошқармаси томонидан ўтказилган тезкор тадбирда, фуқаро М.О. бошқа бир фуқарога тумандаги «Паҳлавон Маҳмуд» маҳалласида жойлашган захирадаги 6 сотих ер майдонини ўзига тегишли эканлигига ишонтириб, ушбу ер майдонини 6,8 минг долларга сотган вақтида ашёвий далиллар билан ушланган.

Департаментнинг Қашқадарё вилоят бошқармаси томонидан ўтказилган тезкор тадбирда эса фуқаро Х.Б. иссиқхона қуриш учун ажратилган ер майдонининг 12 сотихини бошқа бир фуқарога уй-жой қуриш учун бериш эвазига 3 минг долларни фирибгарлик йўли билан олган вақтида ашёвий далиллар билан қўлга олинган.

Мазкур ҳолатлар юзасидан Жиноят кодексининг 168-моддаси (фирибгарлик) билан жиноят ишлари қўзғатилиб, тергов ҳаракатлари ўтказилмоқда.

Аввалроқ Бухорода кўп қаватли уй-жой қуриш учун ер майдони ажратиш эвазига 10 минг доллар талаб қилган шахс қўлга олингани, Фарғона, Наманган ва Сурхондарёда ерни ноқонуний равишда сотаётган шахслар ушлангани тўғрисида хабар берилганди.