Farg‘ona, Namangan va Surxondaryo viloyatida yer maydonlarini noqonuniy ravishda o‘zgaga sotayotgan shaxslar aniqlandi, deya xabar bermoqda DXX matbuot xizmati.

DXX hamda iqtisodiy jinoyatlarga qarshi kurashish departamentining Farg‘ona viloyati boshqarmalari tomonidan o‘tkazilgan tezkor tadbirda, Beshariq tumanidagi fermer xo‘jaliklaridan birining rahbari Beshariq tuman hokimining qarori bilan qishloq xo‘jaligi mahsulotlarini yetishtirish uchun turmush o‘rtog‘i rahbarligidagi dehqon xo‘jaligiga ajratilgan va tumandagi “Toshariq” mahallasida joylashgan 35 sotix yer maydonini 29 ming AQSh dollariga sotishga kelishib, oldindan 20 ming AQSh dollarini olgan vaqtda ushlandi.

DXX Farg‘ona viloyati boshqarmasi va iqtisodiy jinoyatlarga qarshi kurashish departamentining hududiy boshqarmasi xodimlari hamkorligida tezkor tadbirda o‘tkazilgan. Oltiariq tumanidagi Qapchug‘ay qishlog‘ida joylashgan 20 sotix bo‘sh yer maydonini firibgarlik yo‘li bilan 30 ming AQSh dollariga sotishni va hujjatlarni fuqaroning nomiga rasmiylashtirib berishni va’da qilib, kelishilgan mablag‘dan 15 ming AQSh dollarini olgan mansabdor shaxs qo‘lga olingan.

Yana bir holatda, Bog‘dod tumanida yashovchi fuqaro boshqa bir shaxs rahbarligidagi dehqon xo‘jaligiga qarashli 4,75 gektar yer maydonini mijozga 11 ming AQSh dollari evaziga sotishga kelishib, hujjatlarni uning nomiga rasmiylashtirib berishni va’da qiladi. DXX hamda departamentning Farg‘ona viloyati boshqarmalari xodimlari tomonidan o‘tkazilgan tezkor tadbir davomida ushbu fuqaro firibgarlik yo‘li bilan 11 ming AQSh dollarini olgan vaqtda ashyoviy dalillar bilan ushlandi.

Bundan tashqari DXX Namangan viloyati boshqarmasi iqtisodiy jinoyatlarga qarshi kurashish departamentining Chortoq tuman xodimlari bilan hamkorlikda o‘tkazilgan tezkor tadbirda, Chortoq tumanidagi MChJdan biriga qarashli 8 gektar yer maydonini bog‘dorchilik uchun ajratib, tuman hokimi qarorini tanishlari orqali rasmiylashtirib berish evaziga mijozdan 7 ming AQSh dollari va 31,5 million so‘m olmoqchi bo‘lgan fuqaro ushlandi.

DXX Surxondaryo viloyati boshqarmasi va iqtisodiy jinoyatlarga qarshi kurashish departamentining hududiy boshqarmalari xodimlari tomonidan o‘tkazilgan tezkor tadbir davomida, o‘zini Bandixon tumanidagi fermer xo‘jaligi rahbari deb tanishtirib, Davlat zaxirasida bo‘lgan yer maydonidan 2 gektarini 50 million so‘mga sotishini hamda ushbu yer hujjatlarini tuman hokimiyatida ishlovchi tanishiga 50 million so‘m berib hujjat qilib berishini va’da qilib, jami 100 million so‘m so‘raydi va ushbu pulni olgan vaqtida ashyoviy dalillar bilan ushlandi.

Hozirda ushbu shaxslarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.

Bundan avval Sirdaryoda hokimlik zaxirasidagi 14 gektar yerni 30 ming dollar evaziga rasmiylashtirib berishga uringan ota-bola aniqlangani, Farg‘onada 50 sotix yerni 25 ming dollarga noqonuniy sotmoqchi bo‘lgan MChJ boshlig‘i ushlangani hamda DXX Bo‘stonliqda ot sportiga ajratilgan 25,4 gektar yerni 1,5 mln dollarga sotmoqchi bo‘lgan shaxsni qo‘lga olingani haqida xabar berilgandi.