Фойдали деб ҳисобланган айрим маҳсулотларнинг ўзини истеъмол қилиб, кутилгандек натижага эришмаслик мумкин. Гап шундаки, витамин ва минераллар ҳамда фойдали моддалар сўрилиши учун маҳсулотларни бошқа бири билан тўғри умумлаштириш муҳим саналади.
Исмалоқ ва қулупнай
Организмга темир моддаси етишмайдиганлар учун ушбу вариант айни муддао. Исмалоқ таркибида мужассам бўлган тахминан 3 мг темир моддаси қулупнай, лимон, киви ва бошқа меваларда топиш мумкин бўлган C витамини билан яхши сўрилади. Ушбу маҳсулотларни бир-бирига қўшиб, фантазияни ишлатган ҳолда енгил ҳазм бўладиган салат тайёрлаш, таъми янада ўзига хос бўлиши учун эса лимон шарбати қўшиш мумкин.
Салат ва ўсимлик ёғи
Салатга ўсимлик ёғи қўшиб истеъмол қилиш калорияни камайтириш мақсадида ёғнинг исталган туридан воз кечишни афзал билганлар учун яхши умумлашма ҳисобланади. Хом сабзавотлардан тайёрланган салатга ҳеч нима қўшмай тановул қилганда организм бу қадар кўп клетчаткани ҳазм қилишга қийналади ва оқибатда ошқозонда дискомфорт кузатилади. Ўсимлик ёғи эса фойдали моддаларнинг сўрилишини таъминлаш хусусиятига эга ҳисобланади. Ҳатто энг жиддий парҳезда ҳам муҳим саналган фойдали ёғлар истеъмолидан қўрқишга ҳожат йўқ. Агар ёғни хуш кўрмасангиз, унда салатга таркибида омега-9 ёғ кислотаси бўлган авокадо қўшиш тавсия қилинади.
Банан ва йогурт
Кальций организмга яхши сўрилиши учун уни таркибида пробиотиклар сингари таъсир кўрсатувчи инулин бўлган маҳсулотлар билан бирга истеъмол қилиш керак. Ушбу модда саримсоқ, пиёз, буғдой ва бананда мужассам бўлади. Рўйхатда номи келтирилганлардан банан ва йогурт ёки творог энг яхши умумлашма бўлади.
Олма ва қора шоколад
Олма кверсетин, қора шоколад эса катехинни ўз ичига олади. Ушбу антиоксидантларнинг умумлашмаси эса юрак фаолиятини, қон айланишини яхшилайди. Максимал даражада фойдали бўлиши учун улардан ширинлик тайёрлаб кўринг. Бунинг учун эритилган қора шоколадга олма бўлагини ботириб олинг. Бир соат совиткичда турганидан кейин уни бемалол истеъмол қилишингиз мумкин.
Кўк чой ва лимон
Кўк чой қондаги қанд миқдорини меъёрлаштирадиган ва моддалар алмашинувини яхшилайдиган антиоксидантларга бой маҳсулотдир. Бир неча тадқиқотларда эса лимоннинг чойдаги фойдали моддалар сўрилишини яхшилаши аниқланган.
Сули ёрмаси ва оқсил
Ҳар икки маҳсулот таркибида кучли антиоксидантлик хусусиятига эга бўлган фитохимикалин мавжуд. Айнан шу сабаб ҳам сули ёрмасига меваларни қўшиб истеъмол қилиш кўпроқ фойда беради. Натижада қондаги қанд миқдори пасаяди ва тўқлик ҳисси узоқ вақт сақланиб қолади.
Қаҳва ва долчин
Деярли калориясиз, аммо антиоксидантларнинг кони ҳисобланган долчин қора қаҳва учун энг яхши қўшимчадир. Долчин моддалар алмашинувини жадаллаштиради, кофеин билан умумлашмаси эса ёғларни самарали эритади.
Хумус ва зайтун ёғи
Хумус зайтун ёғи билан қўшилганда қондаги «бахт гормони» — серотонин миқдорини ошириш хусусиятига эга. Зайтун ёғи эса фойдали эканидан ташқари, узоқ вақт тўқ юришга ҳисса қўшади.
Изоҳ (0)