ЖЧ—2022 саралаши доирасида ўтиши белгиланган Бразилия ва Аргентина терма жамоалари ўртасидаги 5 сентябрь кунги ўйин 10-дақиқадаёқ тўхтатилди.
Бразилия полицияси Аргентина сафида ҳаракат қилаётган 4 футболчи — Эмилиано Мартинес, Эмилиано Буэндиа (иккиси «Астон Вилла»), Жованни ло Челсо ва Кристиан Ромерони (иккиси «Тоттенҳэм») майдондан олиб чиқиб кетмоқчи бўлди.
Бразилия соғлиқни назорат қилиш ташкилоти (Anvisa) қарорига кўра, мамлакатда Буюк Британиядан келган фуқаролар учун 14 кунлик карантин жорий қилинган. Anvisa’нинг қайд этишича, юқорида исмлари келтирилган футболчилар ҳукуматни Буюк Британияга яқин орада бормагани ҳақидаги сохта ҳужжат билан алдашга уринган.
Anvisa тартиббузарларни ушлаш ва депортация қилишни сўраб, полицияга мурожаат қилган. Бироқ полиция ходимлари меҳмонхонага борган вақтда футболчилар ўйинга жўнаб кетиб бўлган.
Мартинес, Ло Чельсо ва Ромеро Бразилияга қарши ўйинда асосий таркибда майдонга тушганди.
«Ҳакамнинг қарорига кўра Бразилия ва Аргентина терма жамоалари ўртасидаги ўйин қолдирилди. Ҳакам ва комиссар ФИФА тартиб-интизом қўмитасига ҳисобот юборади ва шундан кейин тегишли чоралар кўрилади.
Саралаш босқичи — ФИФА мусобақаси. Ташкилотчилик ва ривожлантириш бўйича барча қарорлар ушбу ташкилот томонидан чиқарилади», — дейилади КОНМЕБОЛ баёнотида.
Изоҳ (0)