Бухоро вилоятининг Пешку туманида содир бўлган йўл-транспорт ҳодисаси оқибатида 19 ёшли ҳайдовчи вафот этди. Бу ҳақда «Дарё»га вилоят ИИБ ЙҲХБ ахборот хизмати раҳбари Улуғбек Шукуруллаев хабар берди.
Таъкидланишича, Пешку туманининг «Ўғлон» маҳалласидан ўтувчи 4Р-48-сонли автомобиль йўлининг 315-километрида автомобиллар тўқнашуви содир бўлган. Nexia-2 ҳайдовчиси йўлнинг хавфли бурилиш жойига келганда, эҳтиётсизлик оқибатида қарама-қарши йўналишга чиқиб кетган. Рул бошқарувини йўқотиб, ҳаракатланиб келаётган «Фура» юк машинасига урилган. Оқибатда Nexia-2 ҳайдовчиси оғир тан жароҳати олиб, Пешку туман марказий касалхонасига ётқизилган. Бироқ кўрсатилган муолажаларга қарамасдан 19 ёшли ҳайдовчи шифохонада вафот этган.
Аниқланишича, вафот этган ҳайдовчи Пешку туманидаги Калласанг қишлоғида яшовчи 2002 йилда туғилган Б.Б. бўлган.
Бухоро вилоят ИИБ ЙХҲБ бошлиғи ҳамда мутахассислар иштирокида йўл-транспорт ҳодисасининг келиб чиқиш сабаби ўрганилган. Воқеа юзасидан ҳозирда суриштирув ишлари ўтказилмоқда.
Аввалроқ Сурхондарёда Nexia ва Matiz тўқнашуви оқибатида бир киши вафот этгани, ҳайдовчилардан бири реанимацияга жойлаштирилгани хабар берилганди.
Мавзуга доир:
Изоҳ (0)