Buxoro viloyatining Peshku tumanida sodir bo‘lgan yo‘l-transport hodisasi oqibatida 19 yoshli haydovchi vafot etdi. Bu haqda “Daryo”ga viloyat IIB YHXB axborot xizmati rahbari Ulug‘bek Shukurullayev xabar berdi.
Ta’kidlanishicha, Peshku tumanining “O‘g‘lon” mahallasidan o‘tuvchi 4R-48-sonli avtomobil yo‘lining 315-kilometrida avtomobillar to‘qnashuvi sodir bo‘lgan. Nexia-2 haydovchisi yo‘lning xavfli burilish joyiga kelganda, ehtiyotsizlik oqibatida qarama-qarshi yo‘nalishga chiqib ketgan. Rul boshqaruvini yo‘qotib, harakatlanib kelayotgan “Fura” yuk mashinasiga urilgan. Oqibatda Nexia-2 haydovchisi og‘ir tan jarohati olib, Peshku tuman markaziy kasalxonasiga yotqizilgan. Biroq ko‘rsatilgan muolajalarga qaramasdan 19 yoshli haydovchi shifoxonada vafot etgan.
Aniqlanishicha, vafot etgan haydovchi Peshku tumanidagi Kallasang qishlog‘ida yashovchi 2002-yilda tug‘ilgan B.B. bo‘lgan.
Buxoro viloyat IIB YXHB boshlig‘i hamda mutaxassislar ishtirokida yo‘l-transport hodisasining kelib chiqish sababi o‘rganilgan. Voqea yuzasidan hozirda surishtiruv ishlari o‘tkazilmoqda.
Avvalroq Surxondaryoda Nexia vа Matiz to‘qnashuvi oqibatida bir kishi vafot etgani, haydovchilardan biri reanimatsiyaga joylashtirilgani xabar berilgandi.
Mavzuga doir:
- Toshkentda “o‘tkazib yubormagani” uchun Matiz’ning oynalarini sindirib tashlagan haydovchi qo‘lga olindi
- Surxondaryoda Cobalt va “Jiguli” ishtirokidagi YTH oqibatida haydovchilardan biri vafot etdi
- Surxondaryoda haydovchi uxlab qolishi oqibatida yuk mashinasiga borib urilgan Damas’da yo‘lovchi vafot etdi
Izoh (0)