Жонс Ҳопкинс университети маълумотларига кўра, дунёда коронавирусга чалинганлар сони 219 095 020 кишига етди, шуларнинг 4 541 882 нафари вафот этган. Дунё бўйлаб айни пайтгача коронавирусга қарши 5 386 098 845 доза вакцина қўлланилган.
Касалланганлар сони бўйича АҚШ (39,5 миллион киши), Ҳиндистон (32,9 миллион), Бразилия (20,3 миллион), Франция (6,8 миллион) ва Россия (6,8 миллион) энг олдинда бормоқда.
Туркия соғлиқни сақлаш вазири Фахриддин Кожанинг маълум қилишича, тез орада мамлакатда Россиянинг «Спутник V» коронавирусга қарши вакцинасини ишлаб чиқариш бошланади. Унинг сўзларига кўра, Туркияда ўтказилган вакцина синовлари «ҳеч қандай салбий натижа кўрсатмаган».
Вазир «Спутник V» ишлаб чиқариш айнан қачондан бошланишини айтмади. «Вакциналарни ишлаб чиқариш бўйича ишлар олиб борилмоқда. Бу билан маҳаллий компания шуғулланяпти, лекин ҳали ишлаб чиқаришни бошламаган. Менимча, бу жараён кўп куттирмайди», — деди Кожа журналистларга.
Туркия апрель ойида «Спутник V»дан фойдаланишни маъқуллаган, июнь ойида мамлакат вакцинанинг биринчи партиясини қабул қилиб олган. Туркияда Sinovac Biotech ва Pfizer / BioNTech вакциналари ҳам қўлланилади. Мамлакатда 37 миллиондан ортиқ одам COVID-19 га қарши тўлиқ эмланган.
Мавзуга доир: Туркияда COVID-19 туфайли янги чекловлар киритилади
Неврологнинг сўзларига кўра, «миядаги туманлик» — COVID-19 дан кейин намоён бўладиган синдромлардан бири бўлиб, у кучли чарчоқни ифодалайди. Симптом ўзи билан диққатни жамлаш ва маълумотни эслаб қолишдаги қийинчиликларни олиб келади. Кўпинча, бу симптомлар коронавирусдан тузалгандан кейин бир неча ой давом этади.
Ушбу симптом кўпинча қарияларда ва сурункали касаллиги бор кишиларда намоён бўлади. «Миядаги туманлик» кўплаб касалликлар белгиси бўлиши мумкин, аммо ҳозирги кунда унинг дунёда кенг тарқалиши COVID-19 дан кейинги реабилитация билан боғлиқ.
Неврология профессорининг сўзларига кўра, бу симптом билан оғриган беморлар учун махсус дорилар мавжуд эмас. Аксинча, уларга вазиятни яхшилашга ёрдам берадиган умумий тавсиялар берилади.
Хусусан, мутахассислар одатдаги ритмга қайтишни, фаол ижтимоий ҳаёт кечиришни ва овқатланишга алоҳида эътибор беришни маслаҳат беради. Шунингдек, сабзавотлар ва ёнғоқ каби хотирани яхшилайдиган овқатларни истеъмол қилиш, ақлни чархлайдиган ўйинлар ўйнаш ва стрессдан сақланиш тавсия қилинади.
Туркманистон Соғлиқни сақлаш ва тиббиёт саноати вазирлиги 1 сентябрь куни Ашхобод аҳолисига ҳавода чанг зарралари кўпайгани ҳақида SMS хабарлар юборди. Шу муносабат билан одамларга тиббий ниқоб тақиш, 2 метрлик ижтимоий масофани сақлаш, шунингдек қўлларини тоза тутиш ва мавсумга мос кийиниш тавсия этилади.Худди шу куни «Нейтралний Туркменистан» газетасида исириқнинг турли касалликларни даволашдаги фойдалари ҳақида яна мақола чоп этилди. 2020 йилда, коронавирус эпидемияси бошланган пайтда, Туркманистон президенти Гурбагули Бердимуҳамедов инфекцияга қарши профилактика чораси сифатида хонага исириқ тутатиш ва қалампир сепилган миллий угра истеъмол қилишни тавсия қилганди.
Гурбангули Бердимуҳамедов мамлакатда коронавирус борлигини ҳалигача инкор этмоқда, аммо аввалроқ у эпидемиологик хавфсизликка жавобгар вазирларни ишдан бўшатганди.
Мустақил ОАВ хабарларига кўра, Туркманистонда COVID-19 пандемиясининг навбатдаги авж олиши кузатилмоқда. Ашхободда бозорлар ва кафелар қайта ёпилган, жамоат транспорти дезинфекция қилинмоқда, полиция ниқобсиз одамларни жаримага тортмоқда, корхона ва ташкилотлар ходимларидан эмланганлик гувоҳномаси талаб қилиниб, акс ҳолда уларга ишдан бўшатиш билан таҳдид қилинмоқда.
Шунингдек, Гурбангули Бердимуҳаммедовнинг буйруғи билан 1 сентябрь куни Туркманистондан Афғонистонга гуманитар ёрдам юборилди, бу «қўшни мамлакатда содир бўлган муҳим воқеалардан сўнг, туркман томонининг Афғонистонга кўрсатган илк гуманитар ёрдами бўлди».
Гуманитар ёрдамга дори-дармонлар, тиббий ходимлар учун ҳимоя кийимлари ва тиббий буюмлар, дезинфекцияловчи воситалар, доривор эритмалар, ҳимоя ниқоблари, жарроҳлик қўлқоплари, коронавирусни даволашда қўлланиладиган воситалар ва препаратлар киритилган. Гуманитар ёрдамни топшириш маросими Ҳирот вилоятининг Тургунди қишлоғида минтақа раҳбарлари ва туркман диаспораси аъзолари иштирокида бўлиб ўтди.
Изоҳ (0)