АҚШнинг Афғонистондаги ҳарбий миссияси тўлиқ якунланган, Панжшер дарасидаги «Толибон»га қаршилик кучларини ҳарбий жиҳатдан қўллаб-қувватлаш ҳақида гап ҳам бўлиши мумкин эмас. Бу ҳақда Пентагон расмий вакили Жон Кирби маълум қилди, деб ёзади «РБК».
«АҚШнинг Афғонистондаги ҳарбий миссияси тугади», — дея жавоб қилди Кирби Панжшер дарасида қуролли қаршилик ташкил қилмоқчи бўлган ва халқаро ҳамжамиятдан ёрдам сўраётган «Толибон»га қарши кучларга америкаликлар ёрдам бера оладими, деган саволга.
Шу билан бирга, у АҚШга нисбатан террорчилик таҳдидлари олдини олиш учун маълум нуқтага қаратилган операциялар амалга оширилиши мумкинлигини истисно қилмади. «Аммо бу бошқа нарса, Афғонистонда узоқ муддатли ҳарбий миссия олиб бориш — бошқа нарса», — дея аниқлик киритди у.
Оқ уй матбуот котиби Жен Псакига ҳам брифинг чоғида Вашингтон қаршилик кучлари билан алоқада бўлиб турган-турмагани ва уларга кўмак бериш-бермаслиги ҳақида шунга ўхшаш савол беришганди. «Улар билан ҳамкорлигимиз ҳақида сизга маълум қилиш мумкин бўлган ҳеч нарса йўқ», — деган эди у ўшанда.
АҚШ ва иттифоқдошлари ўз қўшинларини олиб кетишни бошлаганидан кейин «Толибон» ҳужумга ўтишни бошлаганди. Улар йирик шаҳарларни бирин-кетин эгаллаб, 15 август куни Кобулга етиб келди. Панжшер ҳозиргача «Толибон» назорати остига ўтмаган ягона вилоят бўлиб қолмоқда. У ерда ўзини давлат раҳбари деб эълон қилган вице-президент Амрулла Солиҳ ҳам жойлашиб олган.
22 август куни «Толибон» панжшерликларга ультиматум эълон қилиб, тўрт соат ичида таслим бўлишни талаб қилди. Масъуд Панжшер етакчилари вилоятни топшириб қўймаслигини билдирди. Кейинроқ «Толибон» ҳудудга юзлаб жангчиларни юборганини маълум қилиб, вилоятни қамал қилишни бошлади. «Толибон» Панжшер аҳолисини интернетдан узиб қўйди, ҳудудда мобил алоқа ишлашдан тўхтади.
Масъуд воқеалар ривожи тинч бўлишига умид билдирди, аммо «ҳарбий вариант»ни ҳам истисно қилмади ва қаршилик кучлари эҳтимолий ҳужумларни қайтаришга тайёрланаётганини қайд этди.
1 сентябрь куни Афғонистоннинг Бакҳтар News Агенcй ахборот агентлиги манбаларини ошкор қилмаган ҳолда «Толибон» Панжшерда операция бошлаб, Шутул туманини эгаллаб олгани ҳақида хабар берди. Қаршилик кучлари вакиллари, ўз навбатида, «Толибон» водийга бостириб киришга урингани, аммо уларнинг ҳужуми муваффақиятли тарзда даф этилганини маълум қилди.
Кейинроқ Афғонистоннинг «Толибон»га бўйсунмаган Панжшер вилоятидаги қаршилик кучлари билан тўқнашувларда ҳаракатнинг 300 дан ортиқ аъзоси йўқ қилингани маълум бўлди.
Изоҳ (0)