«Толибон» ҳаракати етакчиси мулла Ҳайбатулла Охунзода Афғонистонга келди, деб ёзади «Интерфакс» афғон ОАВларига таяниб.
Мавжуд маълумотларга кўра, АҚШ ва иттифоқдошларининг қўшинлари Афғонистонда бўлиб турган йилларда Охунзода қўшни Покистонда қочиб юрган.
«Охунзода тўрт кундан буён Қандаҳор вилоятида бўлиб турибди, у ‘Толибон’ етакчилари билан Афғонистондаги вазиятни ва бўлғуси бошқарув тизими яратилишини муҳокама қилмоқда», — дея маълум қилди Ariana News нашри.
Охунзода «Толибон» ҳаракатининг мулла Умар ва Ахтар Мансурдан кейинги учинчи асосчиси ҳисобланади. 2013 йилда Ахтар Мансур мулла Умарнинг вафоти ҳақида эълон қилган ва унинг вориси этиб тайинланган эди. Мансур 2016 йилда Америка учувчисиз қурилмаси зарбаси билан ўлдирилгач, Ҳайбатулла Охунзода «Толибон» бошлиғи деб эълон қилинди.
Июль—август ойларида «Толибон» ҳаракати жангарилари Афғонистондан АҚШ ва иттифоқдошлари қўшинлари олиб кетилиши фонида мамлакатнинг деярли барча вилоятларини бирин-кетин эгаллаб олди ва 15 август куни Кобулга кирди. Пойтахт қўлга олинишидан бир неча соат аввал президент Ашраф Ғани Афғонистондан қочиб кетди. Мамлакатнинг кўплаб раҳбарлари ундан намуна олди.
Айни пайтда фақат Панжшер вилояти жангарилар назорати остига ўтмаган. Панжшер етакчиси, Афғонистон миллий қаҳрамони Аҳмадшоҳ Масъуднинг ўғли Аҳмад Масъуд мамлакатда барча миллий озчиликлар иштирокида ҳукумат тузилишини маълум қилди.
Афғонистонни эгаллаб олган ҳаракат етакчилари мамлакатда инклюзив ҳукумат тузиш бўйича музокаралар олиб бораётганини даъво қилмоқда.
Ҳаракат матбуот котиби Забиҳулла Мужоҳиднинг айтишича, инклюзив ҳукумат яқин кунларда шакллантирилади, ушбу масала бўйича маслаҳатлашувлар давом этмоқда.
Изоҳ (0)