Америкалик ҳарбий хизматчилар Кобул аэропортини тарк эта бошлади. Бу ҳақда Пентагон вакили Жон Кирби маълум қилди, деб ёзади The Hill.
Аввалроқ АҚШ Марказий разведка бошқармасининг Кобул аэропорти ташқарисидаги сўнгги таянч пунктини портлатган эди.
Байден Кобул аэропортига янги ҳужумлар эҳтимоли ҳақида огоҳлантирди
АҚШ Қуролли Кучлари катта эҳтимол билан Кобул аэропорти яқин 24—36 соат ичида яна ҳужумга учраши мумкинлигини истисно қилмаяпти. Президентнинг сўзларига кўра, қўмондонлик уни топшириқни бажара олишига ишонтирган. Аммо Афғонистон пойтахтидаги хавфли вазиятга қарамасдан, АҚШ эвакуацияни давом эттирмоқда.АҚШнинг Афғонистондаги элчихонаси Америка фуқароларидан хавфсизлик юзасидан Кобул аэропорти атрофларини зудлик билан тарк этишни сўради.
Шунингдек, Байден Афғонистондан барча америкалик дипломатларни чақириб олмоқчи. Бироқ АҚШ ҳукумати эвакуация бўйича операция ўтказилганидан кейин дипломатлар Афғонистонга қайтиб бориш-бормаслигини ҳозирча билмайди.
Аввалроқ «Толибон» қўшинлар олиб кетилганидан кейин дипломатик иштирокини сақлаб қолишни АҚШдан сўраган. Давлат департаменти расмий вакилига кўра, бу масалада қарор қабул қилинганича йўқ.
Деярли барча мамлакатлар эвакуацияни якунлади
Афғонистондан чет эл қўшинларини олиб кетиш учун белгиланган сўнгги муддатга уч кун қолганида (28 август куни) деярли барча мамлакатлар Кобул аэропортида тинч фуқароларни эвакуация қилиш бўйича ўз операцияларини якунлади ва энди НАТО мамлакатлари ҳарбий хизматчилари бу мамлакатни тарк этмоқда.Хусусан, Франция, Италия, Нидерландия, Бельгия, Дания, Польша ва Венгрия эвакуацияни якунига етказди. 14 августдан буён АҚШ Афғонистондан 100 мингдан ортиқ одамни эвакуация қилишга улгурди.
«Толибон» аэропорт йўлини тўсишни бошлади
28 август, шанба куни кечки пайтга келиб, афғонистонликлар учун Кобул аэропортига кириш деярли ёпилди. «Толибон» ҳаракати жангарилари оломон тўпланишига йўл қўймаслик учун аэропортга кираверишда қўшимча назорат-ўтказиш пунктларини жойлаштирди. Айни пайтда аввалроқ одамлар аэропортга кириб олиш умидида тўпланиб турган жойларнинг кўпчилиги бўшаб қолган.Кобул аэропортини энди ким назорат қилади?
«Толибон» ҳаракати аэропортдан америкаликлар кетганидан кейин унинг устидан техник назорат олиб боришни Қатарга ёки Туркияга топширмоқчи.«Эшитишимга қараганда, ‘Толибон’ аэропортни, парвозларни техник жиҳатдан ким бошқариши ҳақида ўйламоқда. Туркия, Қатар кўриб чиқилмоқда… Тушунишимча, улар тўйдан олдин ноғора чалмоқчи эмас, ҳам улар диспетчерлик пунктидаги вазифаларни ўзлари бажара олмаслигини тушунади, уларда бундай тажриба йўқ, улар мутахассисларни қидирмоқда», — деди Россиянинг Афғонистондаги элчиси Дмитрий Жирнов.
Аввалроқ Туркия Афғонистондан чет эл қўшинлари олиб кетилганидан кейин Кобул аэропортини бошқариш истагини билдирганди. Шу билан бирга, Туркия президенти Ражаб Тоййиб Эрдўғоннинг сўзларига кўра, бундай таклиф Анқарага «Толибон»дан келиб тушган, бироқ бу масалада қарор қабул қилинганича йўқ.
«Толибон» вакиллари, ўз навбатида, Туркиянинг Афғонистондаги ҳарбий иштироки якунланганини маъқуллади.
Кобул аэропорти 15 август куни «Толибон» ҳаракати жангарилари Афғонистон пойтахтини ва бутун мамлакат ҳудудини ўз назорати остига олганидан буён америкалик ҳарбий хизматчилар бошқаруви остида бўлиб келаётган эди. Кобул аэропортига қарийб олти минг нафар Америка ҳарбий хизматчилари жойлаштирилганди. 26 август куни уларнинг 13 нафари ИШИД ўз зиммасига олган портлашда қурбон бўлди.
Изоҳ (0)