Қозоғистон жанубидаги Жамбил вилоятида аввалроқ ёнғин содир бўлиб, ўқ-дорилар портлаб кетган ҳарбий қисмда 29 август, якшанба куни яна бир портлаш юз берди, деб ёзади «Интерфакс» республика Мудофаа вазирлигига таяниб.
Мудофаа идораси хабарида айтилишича, «26 август куни ёнғин юз берган муҳандислик ўқ-дорилар омборида бугун, 29 август куни соат 12:20 атрофида (Тошкент вақти билан соат 11:20) портлаш овози қайд этилган».
Таъкидланишича, қурбонлар ва жабрланганлар йўқ, воқеа жойида одамлар бўлмаган. Сабаблар аниқлаштирилмоқда.
Эслатиб ўтамиз, 26 август куни кечқурун Қозоғистоннинг Жамбил вилоятида муҳандис-сапёрлик бригадаси жойлашган 28349-сонли ҳарбий қисмда ёнғин содир бўлди. Аланга муҳандислик ўқ-дорилар жойлашган омборни қамраб олди, шундан кейин бир неча марта портлаш юз берди. Қозоғистон ҳукумати ҳодисанинг бир нечта сабабларини кўриб чиқмоқда, қасддан ўт қўйиш версиясини ҳам истисно қилмаяпти.
Аввалроқ фавқулодда вазиятлар вазири Юрий Ильин ҳарбий омбордаги ўқ-дориларнинг қайта портлаши хавфини тўлиқ бартараф қилиш учун 2—3 кун талаб қилинишини билдирганди. Айни пайтда воқеа жойида иккита ўчоқ туташда давом этмоқда. Мудофаа вазирлиги сапёрлари ва ўт ўчирувчилар қайта портлаш хавфи йўқлигига ишонч ҳосил қилиш учун ушбу ўчоқларда иш олиб бормоқда.
Изоҳ (0)