Ниагара шаршараси Ўзбекистон Мустақиллигининг 30 йиллиги шарафига мамлакат байроғи рангларида ёритилади. Бу ҳақда АҚШдаги Ўзбекистон элчихонасига таяниб, Telegram’даги «Нигоҳ» канали хабар берди.
Таъкидланишича, мазкур тадбирни ташкил этиш бўйича келишув Ниагара шаршараси маъмуриятининг раҳбарияти билан 27 август куни амалга оширилган.
Ниагара 1 сентябрь куни маҳаллий вақт билан соат 22:30 да, Тошкент вақти билан 2 сентябрь соат 07:30 да Ўзбекистон байроғини акс эттиради. Мазкур воқеани ушбу ҳавола орқали жонли эфирда томоша қилиш мумкин.
АҚШ ва Канадада яшовчи ўзбекистонликлар ушбу тадбирни сайтдаги анкетани тўлдириб, тўғридан-тўғри томоша қилишлари мумкин бўлади.
Маълумотларга кўра, Ниагара шаршарасининг Ўзбекистон байроғи ранглари билан ёритилиши 15 дақиқа давом этади.
Эслатиб ўтамиз, 2020 йилда Ўзбекистон мустақиллигининг 29 йиллиги муносабати билан Бирлашган Араб Амирликларининг Дубай шаҳрида жойлашган дунёнинг энг баланд иморати Бурж Халифада Ўзбекистон байроғи 1 сентябрь куни 1 дақиқа давомида намойиш этилганди.
Изоҳ (0)