Президент Шавкат Мирзиёев 27 август, жума куни Навоий вилоятига сафарини Кармана туманидан бошлаб, бу ерда хусусий инвестор томонидан барпо этилган янги қуёш электр станциясини ишга тушириш маросимида нутқ сўзлагани ҳақида хабар берилган эди.
Президент матбуот котиби Шерзод Асадовнинг маълум қилишича, давлат раҳбари бу Ўзбекистон тарихида илк бор хусусий инвестор томонидан қурилган электр станцияси эканига эътибор қаратди.
«Биз энергетика соҳасида туб ислоҳотларни бошладик. Электр энергиясини ишлаб чиқариш, узатиш, тақсимлаш ва сотишни ўзида жамлаган монопол давлат компанияси ўрнига бир-биридан мустақил 4 та компания ташкил этилди.
Энергетика соҳасида рақобатдош улгуржи бозорни шакллантириш, хусусий инвесторлар учун кенг имкониятлар яратиш ва шу орқали электр энергиясига ўсиб бораётган талабни мақбул нархларда қондиришни асосий вазифа этиб белгиладик.
Шу тариқа 2025 йилгача юртимизда камида 50 фоиз электр энергиясини хусусий электр станцияларида ишлаб чиқариш учун барча имкониятларни яратиб берамиз», — деган Президент.
Ўзбекистон улгуржи электр энергияси бозорига ўтишни режалаштираётгани ҳақида Энергетика вазирлиги 2021 йилнинг июнь ойида маълум қилганди. Унда Энергетика вазирлиги ҳузурида Schoenherr ва NERA Economic Consulting каби халқаро молия ташкилотлари билан ҳамкорликда фаолият олиб бораётган лойиҳа офиси ташкил этилгани, лойиҳа офиси экспертлари томонидан 2021–2025 йилларга мўлжалланган уч босқичдан иборат улгуржи рақобатбардош электр энергияси бозорига ўтиш кетма-кетлиги ишлаб чиқилгани айтилганди.
Изоҳ (0)