Ўзбекистон Санитария-эпидемиологик осойишталик ва жамоат саломатлиги хизмати ходими Насиба Тоирова турмушга чиқаётган қизларни коронавирусга қарши эмлаш қанчалик тўғри эканлиги борасидаги саволга жавоб берди.
Таъкидланишича, ҳозирги кунда айнан шундай савол билан кўплаб қизлардан мурожаатлар келмоқда.
«Яқин орада тўйи бўлиш арафасидаги қизлар ҳомиладорликни ҳам режа қилиши табиий. Бугунги кунда вакцинанинг ҳомиладор аёлларга таъсир даражаси ўрганилмоқда ва тадқиқотлар ҳамон давом этаётгани маълум. Шу сабабли эмлангандан сўнг гинеколог шифокор билан маслаҳатлашган ҳолда 3-6 ой ўтгач, ҳомиладорликни режалаштириш тавсия этилади.
Вакцина олингач, организмда COVID-19 га қарши антитаначалар пайдо бўлиши учун вақт керак. Иложи бўлса, аввал коронавирусга қарши вакцина билан эмланиб, кейин туғилажак бола ва ўз ҳаётингизни хавфга қўймасдан, ҳомиладорликни режалаштирсангиз, яхши бўларди», — дейди Тоирова.
Унинг сўзларига кўра, олиб борилаётган оммавий эмлаш ёки ZF-UZ-VAC2001 вакцинасининг клиник синовлари жараёнида ҳомиладор бўлиб қолган аёллар ҳам бор бўлиб, вакцинанинг ҳомилага салбий таъсири кузатилмаган.
Аввалроқ Нурмат Отабеков қандай ҳолатларда коронавирусга қарши эмланишда тиббий чекловлар борлигига ойдинлик киритгани, ўзбек-хитой вакцинасининг 2- ва 3-дозалари билан кечроқ эмланишнинг зарари бор-йўғлиги тўғрисида хабар берилганди.
Изоҳ (0)