Тошкент шаҳрида ўтказилаётган «Хавфсиз пойтахт» махсус профилактик тадбирлари давомида маст ҳолда автомобиль бошқарган ҳайдовчи аниқланди. Бу ҳақда «Тошкент» телеканали орқали маълум қилинди.
Маълум қилинишича, пойтахтнинг Қоратош кўчасида олиб борилган тадбир давомида ЙПХ ходимлари Gentra автомобилини кийимсиз бошқариб келаётган ҳайдовчини назорат учун тўхтатган. Текширув давомида машина эгасидан спиртли ичимлик ҳиди анқиб турган, салонда эса турли алкоголь маҳсулотлари бўлган. Фуқаро мастлигини тан олмасдан, ички ишлар ходимларига қаршилик кўрсата бошлаган.
Ўтказилган тиббий экспертиза натижасига кўра, ҳайдовчининг спиртли ичимлик истеъмол қилгани тасдиқланган. Gentra автомобили жарима майдончасига жойлаштирилган.
Шунингдек, патруль-пост хизмати ходимлари томонидан назорат учун тўхтатилган яна бир Lacetti ҳайдовчиси орган ходимларига сабабсиз қаршилик кўрсатган.
Текширув давомида машина ичида бўлган йўловчилар сумкасидан гиёҳвандлик моддаси дея тахмин қилинган воситалар топилган. Ҳолат бўйича тўпланган ҳужжатлар ва ашёвий далиллар Тергов бошқармаси ходимларига топширилган.
Аниқланган ҳолатлар бўйича маъмурий баённомалар расмийлаштирилган, қоидабузарлар жавобгарликка тортилган.
Аввалроқ Чироқчида ЙПХ инспектори бошқарувидаги Lacetti иштирокида ЙТҲ содир бўлгани, Урганчда Malibu ҳайдовчиси ЙПХ ходимларининг қонуний талабига бўйсунмай, улар билан жанжаллашгани, Тошкентда ҳайдовчини тегишли белги қўйилмаган йўлда қоида бузганида айблаган ЙПХ ходимига танбеҳ берилгани, Олмалиқда ЙПХ ходимини ҳақорат қилган ҳайдовчига жиноят иши қўзғатилиши мумкинлиги тўғрисида хабар берилганди.
Изоҳ (0)