24 август куни Мудофаа ва хавфсизлик масалалари қўмитасининг Ўзбекистон Қуролли Кучлари академиясида бўлиб ўтган мажлисида Тошкент вилояти ва Тошкент шаҳри чегараларини ўзгартириш масаласи муҳокама қилинди. Бу ҳақда қўмита матбуот хизмати «Дарё»га маълум қилди.
Маълум қилинишича, Тошкент шаҳри аҳолиси сони 2021 йил 1 июль ҳолатига кўра, 2,737 миллион кишини ташкил этиб, 2021 йил бошига нисбатан 42,8 минг кишига ёки 101,6 фоизга ўсган, аҳолининг зичлиги 1 километр/квадратга 7564 кишини ташкил этади. Бу эса ўз навбатида келажакда Тошкент шаҳрини ривожлантириш, ҳудудини янада кенгайтириш каби масалаларни юзага чиқаради.
«Тошкент шаҳри аҳолиси сонининг йил сайин юқори суръатларда ўсиб бориши натижасида шаҳарда янги ижтимоий соҳа объектларини қуриш, янги ишлаб чиқариш ва хизмат кўрсатиш корхоналарини ташкил этиш, маданий ва дам олиш масканларини кўпайтириш масалаларини ҳал этиш чораларини кўриш талаб этилади. Бу каби муаммолар Тошкент шаҳри ҳудудини босқичма-босқич кенгайтириш орқали амалга оширилиши мумкин», — дейилади хабарда.
Шу боис Олий Мажлис Сенати қарорига кўра, Тошкент вилоятидан 7 853,3 гектар ер майдони Тошкент шаҳрига, Тошкент шаҳридан 171,3 гектар ер майдони Тошкент вилояти ҳудудига ўтказилиши белгиланмоқда.
Тошкент вилоятидан Тошкент шаҳрига ўтаётган ҳудудларда 42 та маҳалла фуқаролар йиғини мавжуд бўлиб, бугунги кунда ушбу ҳудудларда 95 872 нафар аҳоли (23 249 та оила, 29 010 та хонадон мавжуд) истиқомат қилади.
«Тошкент вилояти ҳудудидан Тошкент шаҳрига ер майдонлари ўтказилиши натижасида аҳоли турмуш шароити янада яхшиланиб, ишлаб чиқариш ва хизмат кўрсатиш соҳаларини кенгайтиришга, хорижий инвестицияларни кенг жалб этишга, шаҳар экспорт салоҳиятини оширишга, муҳандислик-коммуникация ва йўл инфратузилмаси объектларини янада яхшилашга хизмат қилади», — дея қайд этилади хабарда.
Эслатиб ўтамиз, 2020 йилнинг 5 август куни Шавкат Мирзиёев Тошкент шаҳри ва Тошкент вилоятининг ўзаро чегарадош бўлган туманлари ҳудудларини ўзгартириш бўйича тайёрланган лойиҳалар тақдимоти билан танишганди. Ўшанда аҳолига қулайлик яратиш мақсадида шаҳардан Тошкент вилоятига 1010 гектар, вилоятдан пойтахтга 10 196 гектар ер майдони ўтказилиши режалаштирилган эди. Кейинроқ Улуғбек шаҳарчасининг аҳолиси Тошкент вилояти таркибига, шунингдек, Учтепа тумани яшовчилари учта маҳалла Тошкент вилоятининг Зангиота тумани таркибига ўтказишга қарши чиққанди.
Изоҳ (0)