O‘zbekiston Sanitariya-epidemiologik osoyishtalik va jamoat salomatligi xizmati xodimi Nasiba Toirova turmushga chiqayotgan qizlarni koronavirusga qarshi emlash qanchalik to‘g‘ri ekanligi borasidagi savolga javob berdi.
Ta’kidlanishicha, hozirgi kunda aynan shunday savol bilan ko‘plab qizlardan murojaatlar kelmoqda.
“Yaqin orada to‘yi bo‘lish arafasidagi qizlar homiladorlikni ham reja qilishi tabiiy. Bugungi kunda vaksinaning homilador ayollarga ta’sir darajasi o‘rganilmoqda va tadqiqotlar hamon davom etayotgani ma’lum. Shu sababli emlangandan so‘ng ginekolog shifokor bilan maslahatlashgan holda 3-6 oy o‘tgach, homiladorlikni rejalashtirish tavsiya etiladi.
Vaksina olingach, organizmda COVID-19 ga qarshi antitanachalar paydo bo‘lishi uchun vaqt kerak. Iloji bo‘lsa, avval koronavirusga qarshi vaksina bilan emlanib, keyin tug‘ilajak bola va o‘z hayotingizni xavfga qo‘ymasdan, homiladorlikni rejalashtirsangiz, yaxshi bo‘lardi”, — deydi Toirova.
Uning so‘zlariga ko‘ra, olib borilayotgan ommaviy emlash yoki ZF-UZ-VAC2001 vaksinasining klinik sinovlari jarayonida homilador bo‘lib qolgan ayollar ham bor bo‘lib, vaksinaning homilaga salbiy ta’siri kuzatilmagan.
Avvalroq Nurmat Otabekov qanday holatlarda koronavirusga qarshi emlanishda tibbiy cheklovlar borligiga oydinlik kiritgani, o‘zbek-xitoy vaksinasining 2- va 3-dozalari bilan kechroq emlanishning zarari bor-yo‘g‘ligi to‘g‘risida xabar berilgandi.
Izoh (0)