Тошкентда фуқарони Қирғизистонга ўқишга киритиб, уни Тошкентдаги фармацевтика институтига кўчириб бериш учун 3,5 минг доллар сўраган шахс ушланди

Тошкент шаҳрида фуқароларни олий таълим муассасасига киритиш эвазига пул талаб қилган шахслар қўлга олинди, деб хабар беради Бош прокуратура ҳузуридаги департамент.

Маълум қилинишича, департаментнинг Миробод тумани бўлими томонидан ДХХ билан ҳамкорликда тезкор тадбир ўтказилган. Тадбирда З.А. исмли шахс фуқаро Ш.ни танишлари орқали Қирғизистоннинг фармацевтика олийгоҳига ўқишга киритиб қўйишни ваъда қилгани аниқланган. Кейинчалик ўқишини Тошкент фармацевтика институтига кўчириб бериш эвазига ундан 3,5 минг долларни фирибгарлик йўли билан олган З.А. ашёвий далиллар билан ушланган.

Шунингдек, департаментнинг Янгиҳаёт туман бўлими томонидан ўтказилган тезкор тадбирда О.У. исмли шахс фуқаро Ю.ни 2 минг доллар эвазига Ўзбекистон темир йўллари техникумига танишлари орқали ўқишга киритиб қўйишни ваъда қилгани аниқланган. О.У. олдиндан 1000 доллар олган вақтида ашёвий далиллар билан қўлга тушган.

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.

Аввалроқ Наманганда фуқаронинг Қирғизистондаги ўқишини 6 минг доллар эвазига кўчириб беришни ваъда қилган талаба ва университет ўқитувчилари ушлангани тўғрисида хабар берилганди.