Бухорода қорамол ўғрилиги билан шуғулланиб келган гуруҳ қўлга олинди. Бу ҳақда «Дарё»га вилоят ИИБ ахборот хизмати раҳбари Шуҳрат Жалолов маълум қилди.
Таъкидланишича, 2021 йилнинг 16 январь куни Шофиркон туманидаги Ғалаба чўл-массивида жойлашган «Ғалаба» МЧЖга тегишли бўлган жами нархи 8 миллион сўмга тенг саккиз бош қўй ўғирланган. Ҳолат юзасидан Шофиркон туман ИИБ тезкор гуруҳи ходимлари томонидан олиб борилган суриштирув жараёнида ўғрилик шофирконлик фуқаро А.Ч. ва унга аввалдан таниш бўлган тўрт нафар шериги томонидан содир этилгани аниқланган.«Қорамол ўғрилиги айримлар томонидан бир қарашда кичик ўғрилик, деб баҳоланади. Аммо ўғриликнинг катта-кичиги бўлмайди. Биргина ушбу ҳолат тергов-суриштируви қарийб, олти ойча давом этди. Бу давр мобайнида эса А.Ч. ва унинг шериклари билан олиб борилган тергов-суриштирувларда уларнинг тўрт йилдан буён қорамол ўғрилиги билан шуғулланиб келишгани ойдинлашди», — дейди Шуҳрат Жалолов.
Билдирилишича, фуқаро А.Ч. аввалдан одамларнинг қорамолини ўғирлаш билан шуғулланиб келган. У 2017 йил 17 декабрь куни кечки пайт Шофиркон тумани, «Пахтаобод» МФЙ, Полвонобод қишлоғи фуқароси Ф.Х.нинг яшаш уйига ғайриқонуний равишда кириб, унинг қўрасидан икки бош қўчқорни ўғирлаб, воқеа жойидан яширинган.
2020 йилнинг декабрь ойида эса ўзининг олдиндан танишлари бўлган Н.Н., Ш.Х., А.Р. ҳамда Т.И. каби фуқаролар билан тил бириктирган ҳолда Ғиждувон тумани «Кўкча» МФЙдаги Оёқоғритма қишлоғидаги яйловдан қаровсиз қолдирилган фуқаро Ш.Г.га тегишли ҳар бирининг баҳоси 1 миллион сўмдан бўлган олти бош эчкини ўғирлаган. 29 декабрь куни уюшган гуруҳ яна ўз хатти-ҳаракатини давом эттириб, соат 22:30 да Шофиркон туманидаги «Қўрғони Вардонзе» МФЙ, «Чуруқчўл» массиви ҳудудида қаровсиз ҳолда қолдирилган жами баҳоси 10 миллион 800 минг сўмлик олти бош қўй ҳамда бир бош эчкини ўғирлаб, ўзларига тегишли автоуловга юклаб кетган ва яшириниб юрган.
Худди шундай жиноятни 2021 йилнинг январь ойида яна такроран содир этган. Улар Пешку туманидаги Жонгелди қишлоғи фуқароси Р.А.га тегишли ўт-яйловда ўтлаб юрган, ҳар бирининг баҳоси 2 миллион 400 минг сўмдан бўлган икки бош қўчқор ҳамда баҳоси 1 миллион 800 минг сўмдан бўлган тўрт бош қўйни талон-торож қилиб, фуқарога 12 миллион сўм моддий зарар етказган.
А.Ч. ва унинг шериклари охирги хатти-ҳаракати 2021 йилнинг 16 январь куни содир этган. Қўлга олинган уюшган гуруҳнинг барча хатти-ҳаракатлари тергов-суриштирув давомида ошкор бўлган.
Мазкур ҳолат юзасидан тўрт нафар шахсга нисбатан Шофиркон туман ИИБ тергов бўлинмаси томонидан Ўзбекистон Республикаси Жиноят кодексининг 169-моддаси (ўғрилик) билан жиноят иши қўзғатилиб, қамоққа олиш эҳтиёт чораси қўлланилган.
Мавзуга доир:
- Тошкентда автомобиль шиналари ва дискларини ўғирлаб, ўрнига ғишт қўйиб кетаётган шахслар ушланди
- Бухорода содир этилган ўғрилик синган шишада қолдирилган бармоқ изи орқали топилди
- Бухорода ўғрилиги туфайли ота-онаси томонидан ИИБга топширилган бола суд ҳукмига кўра, 1 млн 225 минг сўм жаримага тортилди
Изоҳ (0)